{
 "canonical_id": "sf-20180701-1139",
 "canonical_url": "https://lovspor.no/forskrift/forskrift-om-allment-tilgjengelege-dokument/",
 "language": "no",
 "links": {
  "parent": null
 },
 "provenance": {
  "renderer_version": 8,
  "representation_hash": "cf95c6d9391ec8149b13c3882ee77b473d9c970f4c2f146a23e892e085da0c71",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "59f3844ee9c091fe5bd201baf231a98f3d627eafb514a7ef3f5e608ff7c72845"
 },
 "ref_id": "forskrift/2018-07-01-1139",
 "schema_version": "1",
 "slug": "forskrift-om-allment-tilgjengelege-dokument",
 "source": {
  "dataset": "gjeldende-sentrale-forskrifter",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2018-07-01",
  "last_change_in_force": null,
  "note": "Current corpus state; not an applicability-at-date determination.",
  "status": "current"
 },
 "text": "\n# Forskrift om avleveringsplikt for allment tilgjengelege dokument\n\n## § 1. Oppgåvene og myndigheita til Nasjonalbiblioteket\n\nDokument omfatta av pliktavleveringslova skal leverast til Nasjonalbiblioteket.\n\nNasjonalbiblioteket gjer vedtak i spørsmål om pliktavlevering etter forskrifta her.\n\nNasjonalbiblioteket skal gjennom informasjonstiltak, kontroll og purrerutinar syte for at avleveringsplikta vert etterlevd.\n\n## § 2. Dokument omfatta av avleveringsplikta\n\nAvleveringa gjeld fysiske og digitale dokument som er\n\n1. skriftlege\n2. levande bilete og film\n3. lydfestingar\n4. kombinasjonar av bokstav a, b og c\n5. lyd- og biletprogram\n6. dataspel\n7. nettbaserte.\n\n## § 3. Forma og kvaliteten på eit dokument\n\nFysiske og digitale dokument skal avleverast i den forma dei vert gjort allment tilgjengelege i, når ikkje noko anna er særskilt fastsett eller det går fram av samanhengen.\n\nAvleveringseksemplar skal vere fullstendige og lytefrie og avleverast med omslag, futteral o.l. som følgjer det allment tilgjengelege dokumentet.\n\nNasjonalbiblioteket kan berre krevje dokumenta avlevert i ei form eller ein kvalitet som er naudsynt for å ivareta formåla med lova.\n\n## § 4. Følgjeopplysningar og metadata\n\nNasjonalbiblioteket kan krevje at følgjeopplysningar og metadata som er naudsynte for å ivareta formålet med lova, blir sendt inn saman med avleveringspliktig eksemplar. Berre følgjeopplysningar og metadata som vert skapte i samband med produksjonen av dokumentet skal avleverast.\n\n## § 5. Pakking og sending\n\nAvleveringseksemplar skal vere forsvarleg pakka ved innsendinga. Dersom eksemplara er skadde, og dette skuldast aktløyse frå den avleveringspliktige si side, skal avsendaren utan opphald sende inn nye eksemplar.\n\nDigitale dokument skal sendast inn på ein fysisk berar eller overførast via nettverk.\n\n## § 6. Tidspunkt for innsending\n\nUtgjevar og importør skal sende inn avleveringseksemplar når dokumentet vert gjort tilgjengeleg for allmenta, om ikkje noko anna er særskilt fastsett.\n\nDen som har produsert eit dokument skal sende inn avleveringseksemplar seinast ein månad etter at dokumentet er produsert.\n\nNasjonalbiblioteket kan avtale med den avleveringspliktige andre tidspunkt for å sende inn dokumenta.\n\n## § 7. Avgrensingar\n\nEit dokument er ikkje omfatta av avleveringsplikta når det\n\n1. er laga i Noreg for ein utanlandsk utgjevar berre for ein utanlandsk marknad\n2. vert gjort tilgjengeleg berre ved utdeling, framsyning eller framføring som del av undervisning, føredrag eller liknande.\n\nNasjonalbiblioteket kan lempe på eller heilt gjere unnatak frå avleveringsplikta.\n\n## § 8. Fordelinga av avleveringsplikta\n\nAvleveringsplikta skal delast mellom den som har produsert dokumentet og utgjevaren.\n\nEr eit dokument produsert i Noreg, skal den som har produsert det levere tre eksemplar og utgjevaren fire.\n\nUtgjevaren skal levere alle avleveringseksemplara dersom\n\n1. dokumentet er digitalt\n2. dokumentet er ei avis\n3. delar av dokumentet vert produsert av fleire produsentar\n4. utgjevaren har produsert dokumentet sjølv eller har fått det laga i utlandet.\n\nProdusenten skal levere alle avleveringseksemplara dersom utgjevaren er utanlandsk.\n\nImportøren skal levere alle avleveringseksemplara dersom både produsenten og utgjevaren er utanlandske.\n\nNasjonalbiblioteket kan fastsetje ei anna fordeling eller leggje heile avleveringsplikta på ein av dei leveringspliktige.\n\n## § 9. Fordeling av fysiske eksemplar\n\nDokument som vert levert inn med inntil sju eksemplar, skal Nasjonalbiblioteket vidaresende til universitetsbiblioteka i Oslo, Bergen, Trondheim og Tromsø og til Sametingets bibliotek i Karasjok.\n\nDei mottekne eksemplara skal vidaresendast etter prioriteringa her slik at\n\n1. det første eksemplaret er tryggingseksemplar i Nasjonalbiblioteket\n2. det andre eksemplaret er brukseksemplar til Nasjonalbiblioteket\n3. det tredje eksemplaret er fjernlånseksemplar til depotbiblioteket ved Nasjonalbiblioteket\n4. det fjerde, femte og sjette eksemplaret vert fordelte til universitetsbiblioteka i Bergen, Trondheim og Tromsø med jamt vekslande prioritering. Dersom ein monaleg del av innhaldet er på samisk språk eller ein monaleg del av innhaldet omhandlar samiske forhold skal det eksemplaret som er meint for Bergen fordelast til Sametingets bibliotek\n5. det sjuande eksemplaret vert fordelt til Universitetsbiblioteket i Oslo.\n\n## § 10. Bevaringsplikta og registreringa\n\nNasjonalbiblioteket pliktar utan tidsavgrensing å ta vare på eitt eksemplar av alle dokument som tryggingseksemplar.\n\nNasjonalbiblioteket skal snarast råd registrere dei mottekne dokumenta. For dei tilfella der det vil vere særleg arbeidskrevjande eller upraktisk å registrere kvart dokument einskilt, kan Nasjonalbiblioteket avgjere at dokumenta skal ordnast i grupper etter emne og art.\n\nNasjonalbiblioteket har ansvaret for å katalogisere på nasjonalbibliografisk nivå og tilhøyrande katalogprodukt.\n\nInndrege dokument etter [pliktavleveringslova § 7](lov/1989-06-09-32/§7) skal oppbevarast av Nasjonalbiblioteket i eit særskilt låst magasin.\n\n## § 11. Skriftlege dokument\n\nSom skriftlege dokument reknast\n\n1. bøker\n2. nummererte og unummerete seriar av til dømes rapportar, skrift og særtrykk\n3. periodiske skriftstykke som til dømes tidsskrift, vekeblad, aviser, bedriftsaviser, medlemsblad og kyrkjelydsblad\n4. brosjyrar\n5. flygeblad og opprop\n6. rettleiingshefte, katalogar og faldarar som til dømes muséguidar, utstillingskatalogar og turisthandbøker\n7. lover, reglement, statuttar og vedtekter for bedrifter, lag, institusjonar og organisasjonar\n8. prislister og reklameprent\n9. program for til dømes idrettsarrangement, konsertar og teaterframsyningar og politiske parti\n10. rundskriv\n11. tabellar – t.d. lønstariffar\n12. årsmeldingar, kvartalsrapportar o.l. frå bedrifter, lag, institusjonar og organisasjonar\n13. bilet-, kart- og musikkprent, grafiske tabellar og planar, plakatar, postkort, prospekt og plansjar\n14. dokument i blindeskrift når informasjonen berre finst i denne skriftforma\n15. andre allment tilgjengelege skriftlege dokument som ikkje er nemnde i andre ledd.\n\nDesse skriftlege dokumenta skal likevel ikkje avleverast\n\n1. blankettar, formular, skjema og liknande som skal fyllast ut\n2. etikettar, skrivepapir og konvoluttar med preg, visittkort, adressekort og liknande\n3. emballasjetrykk i varehandelen\n4. dokument i blindeskrift dersom den same informasjonen ligg føre i vanleg skrift\n5. dokument som i all hovudsak inneheld informasjon som er direkte utdrag frå andre allment tilgjengelege dokument\n6. spel, utklippsbilete og kalendrar utan annan tekst enn datoar\n7. innbydingar og menyar\n8. billettar, lodd og andre verdirepresentativ\n9. kunstverk som målarstykke, grafiske blad og liknande.\n\n## § 12. Levande bilete og film\n\nFilmar som er utgjevne på ein fysisk berar, skal leverast i inntil sju fysiske eksemplar.\n\nDokument med levande bilete som er gjorde tilgjengelege via elektroniske kommunikasjonsnett og med kunstnariske, kommersielle eller allmennopplysande formål, skal leverast i eitt digitalt eksemplar.\n\nFilmar som er offentleg framførte og ikkje berre tilgjengelege via elektroniske kommunikasjonsnett, skal leverast i minst eitt brukseksemplar og ein masterkopi. Alle versjonar av ein film skal avleverast.\n\n## § 13. Lydfestingar\n\nLydfestingar av musikk eller tale som er utgjevne på ein fysisk berar, skal leverast i inntil sju eksemplar.\n\nDersom lydopptak vert gjevne ut på fleire medium eller tekniske plattformer, t.d. grammofonplate, kassettband og kompaktplate skal det avleverast inntil sju eksemplar av kvart slag.\n\nLydfestingar som er tilgjengelege via elektroniske kommunikasjonsnett for kunstnarlege, kommersielle eller allmennopplysande formål, skal avleverast i eitt digitalt eksemplar.\n\n## § 14. Kombinasjonar av skriftlege dokument, levande bilete og film og lydfestingar\n\nDersom dokument i ulike medium og tekniske plattformer utgjer ein heilskap, til dømes som læremiddelpakker, skal utgjevaren avlevere sju komplette eksemplar av det kombinerte dokumentet. Kombinerte dokument som berre er digitale, skal avleverast i eitt digitalt eksemplar. Dersom utgjevaren er utanlandsk, skal importøren avlevere eksemplara.\n\n## § 15. Kringkasting og audiovisuelle tingingstenester\n\nNorsk rikskringkasting AS og andre kringkastarar og tenestetilbydarar etter [kringkastingslova § 1-1](lov/1992-12-04-127/§1-1) bokstav f skal avlevere alle lyd- og biletprogram som er kringkasta eller gjort tilgjengelege i ei audiovisuell tingingsteneste, jf. [kringkastingslova § 1-1](lov/1992-12-04-127/§1-1) bokstav a og d.\n\nDokumenta skal avleverast Nasjonalbiblioteket i eitt digitalt eksemplar seinast sju yrkedagar etter at innhaldet vart publisert første gongen.\n\n## § 16. Dataspel\n\nDataspel skal avleverast i inntil sju eksemplar når dei er utgjevne på ein fysisk berar, men i eitt eksemplar dersom det berre er gjort tilgjengeleg via elektroniske kommunikasjonsnett.\n\n## § 17. Nettarkivnemnda\n\nAvslag frå Nasjonalbiblioteket på ein søknad om å klausulere eller slette eit dokument etter [lov 9. juni 1989 nr. 32](lov/1989-06-09-32) om avleveringsplikt for allment tilgjengelege dokument [§ 4b](lov/1989-06-09-32/§4b), kan klagast inn til Nettarkivnemnda.\n\nNemnda skal ha tre medlemmer med personlege varamedlemmer. Kulturdepartementet oppnemner medlemmene. Leiaren skal vere jurist.\n\nNettarkivnemnda kan avgjere at eit dokument skal klausulerast eller slettast i samsvar med [pliktavleveringslova § 4b](lov/1989-06-09-32/§4b).\n\nKulturdepartementet har ikkje instruksjons- eller omgjeringsrett overfor Nettarkivnemnda i enkeltsaker.\n\nMedlemmene skal oppnemnast for ein periode på inntil fire år og kan gjenoppnemnast ein gong. Nettarkivnemnda skal ha eit saksførebuande sekretariat.\n\nNettarkivnemnda kan berre treffe vedtak når nemnda er fulltalig. Nemnda skal avgjere klagene med alminneleg fleirtal.\n\n## § 18. Ikraftsetjing\n\nForskrifta gjeld frå 1. juli 2018. Frå same tidspunkt vert [forskrift 25. mai 1990 nr. 427](forskrift/1990-05-25-427) om avleveringsplikt for allment tilgjengelege dokument oppheva.\n",
 "title": "Forskrift om avleveringsplikt for allment tilgjengelege dokument",
 "type": "forskrift"
}