{
 "canonical_id": "sf-20060607-0593",
 "canonical_url": "https://lovspor.no/forskrift/forskrift-om-berekraftig-skogbruk/",
 "language": "no",
 "links": {
  "parent": null
 },
 "provenance": {
  "renderer_version": 8,
  "representation_hash": "1b1753f5b4bfcb6ba0d7b3e24f1ab305b0db399c3fe23734337f2de44984f032",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "2d2969d748d067dfd894367a890b94252e62b175efd9511b81f2f927f5033294"
 },
 "ref_id": "forskrift/2006-06-07-593",
 "schema_version": "1",
 "slug": "forskrift-om-berekraftig-skogbruk",
 "source": {
  "dataset": "gjeldende-sentrale-forskrifter",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2006-07-01",
  "last_change_in_force": "2024-01-01",
  "note": "Current corpus state; not an applicability-at-date determination.",
  "status": "current"
 },
 "text": "\n# Forskrift om berekraftig skogbruk\n\n## Kapittel 1. Innleiande føresegner\n\n### § 1. Formål\n\nFormålet med denne forskrifta er å fremme eit berekraftig skogbruk som sikrar miljøverdiane i skogen, aktiv forynging og oppbygging av ny skog, og god helsetilstand i skogen, jf. [§ 1 i skogbrukslova](lov/2005-05-27-31/§1).\n\n### § 2. Virkeområde\n\nForskrifta gjeld for all skog og skogmark, jf. [§ 2 i skogbrukslova](lov/2005-05-27-31/§2).\n\n## Kapittel 2. Miljøomsyn\n\n### § 3. Plikta til å ta miljøomsyn\n\nVed gjennomføring av skogbrukstiltak skal skogeigaren sjå til at det blir teke nødvendige omsyn til biologisk mangfald, friluftsliv, landskap og kulturverdiar i samsvar med føresegnene i [skogbrukslova](lov/2005-05-27-31).\n\nSkogeigar skal sjå til at også dei som gjer arbeid i skogen tek slike omsyn.\n\n### § 4. Miljødokumentasjon og miljøregistreringar\n\nSkogeigar skal kunne gjere greie for dei miljøomsyn som ligg til grunn for planlagde eller utførte tiltak i skogen, jf. [lov 9. mai 2003 nr. 31 om rett til miljøinformasjon og deltakelse i offentlige beslutningsprosesser av betydning for miljøet (miljøinformasjonsloven)](lov/2003-05-09-31).\n\nHogst kan normalt berre skje i område der det er gjennomført miljøregistreringar, jf. [forskrift 4. februar 2004 nr. 449 om tilskudd til skogbruksplanlegging med miljøregistreringer](forskrift/2004-02-04-449). Ved hogst i område der slike registreringar enno ikkje er gjennomførte, skal dei føre-var-tiltaka som er nedfelte i Norsk PEFC Skogstandard leggjast til grunn.\n\n> Endra ved [forskrift 2 feb 2015 nr. 88](forskrift/2015-02-02-88).\n\n### § 5. Miljøomsyn ved skogbrukstiltak\n\nVed gjennomføring av skogbrukstiltak skal skogeigaren sørgje for at verdiane i viktige livsmiljø og nøkkelbiotopar blir tekne vare på i samsvar med retningslinene i Norsk PEFC Skogstandard.\n\nEtter hogst skal kvist og hogstavfall ryddast bort frå bekkar, elver og vatn, og frå vanleg brukte stiger, løyper og andre ferdselsårer der det er til unødig hindring for ferdsel.\n\nKøyreskadar etter skogbrukstiltak må utbetrast snarast råd etter avslutta drift, slik at det ikkje oppstår unødig hindring for ferdsel i vanleg brukte stigar, løyper og andre ferdselsårer, eller oppstår nye bekkeløp.\n\nVed hogst skal det setjast igjen minst 5 stormsterke tre pr. hektar som livsløpstre, helst i grupper. Livsløpstrea skal primært veljast blant dei eldste trea.\n\nHogstar skal tilpassast landskapet. Der forholda biologisk, økonomisk og teknisk ligg til rette for det skal det brukast lukka hogstar, dersom ein kan oppnå god stabilitet for gjenståande tre og tilfredsstillande forynging på veksestaden.\n\nVed hogst i kantsoner mot vatn og vassdrag og mellom skog og anna mark skal kantsona sin økologiske funksjon takast vare på.\n\nI forynging av barskog skal ein tilstreve eit minimum på 10% lauvtre.\n\nI skog der volumet av bartre utgjer meir enn halvparten av det totale volumet i bestanden før hogst, kan skifte av treslag frå bar til lauv berre skje etter godkjenning frå kommunen. Skifte av treslag i edellauvskog kan berre skje etter godkjenning frå kommunen, med unntak av skifte av treslag i eikeskog på låg og middels bonitet. Skogeigar må søke om slik godkjenning innan 6 månader etter at hogsten har skjedd.\n\nNygrøfting av myr og sumpskog med sikte på skogproduksjon er forbode. Det er heller ikkje tillate å reinske grøfter i myr og sumpskog der det ikkje er etablert produktiv skog.\n\nSkogreising på snaumark og skifte av treslag på samanhengande areal over 100 dekar krev melding til kommunen. Har kommunen ikkje gitt svar på meldinga innan 3 veker frå da meldinga kom fram til kommunen, kan det meldte tiltaket setjast i verk. Om kommunen treng meir tid for å ta stilling til tiltaket, kan fristen forlengjast med inntil 14 dagar. Krav om melding til kommunen gjeld ikkje for skifte av treslag etter åttande ledd.\n\nBruk av utanlandske treslag til skogproduksjon kan berre skje etter godkjenning frå kommunen. Ved avgjerda skal kommunen leggje vekt på å unngå ukontrollert spreiing av slike treslag ved naturleg forynging.\n\nVed skogbrukstiltak skal det takast omsyn til kulturminne (jf. [lov 9. juni 1978 nr. 50 om kulturminner § 4](lov/1978-06-09-50/§4)).\n\n> Endra ved [forskrifter 2 feb 2015 nr. 88](forskrift/2015-02-02-88), [18 aug 2021 nr. 2528](forskrift/2021-08-18-2528), [25 sep 2023 nr. 1473](forskrift/2023-09-25-1473) (i kraft 1 jan 2024).\n\n## Kapittel 3. Forynging etter hogst\n\n### § 6. Plikta til å forynge\n\nSkogeigaren skal sørgje for tilfredsstillande forynging etter hogst, jf. [skogbrukslova § 6](lov/2005-05-27-31/§6). Med tilfredsstillande forynging meinast både planting, såing og naturforynging som skal sikre framtidig skogproduksjon og som er i tråd med krava i [§ 7](forskrift/2006-06-07-593).\n\n> Endra ved [forskrift 25 sep 2023 nr. 1473](forskrift/2023-09-25-1473) (i kraft 1 jan 2024).\n\n### § 7. Krav til tilfredsstillande forynging\n\nForynging etter hogst skal leggje til grunn plantetala i tabellen nedanfor. Ved vurdering av minste lovlege plantetal reknast berre som teljande treslag dei treslaga som utnyttar veksttilhøva på veksestaden best, og som kan gi ein tilfredsstillande produksjon av virke, både når det gjeld volum og kvalitet.\n\n| *Gran- og/eller lauvdominert skog* |  |  |  | *Furudominert skog* |  |  |\n| --- | --- | --- | --- | --- | --- | --- |\n|  | *G26–G20* | *G17–G14* | *G11–G6* | *F20–F17* | *F14–F11* | *F8–F6* |\n| Tilrådd plantetal pr. dekar | 300–180 | 230–130 | 140–60 | 340–190 | 240–120 | 130–80 |\n| Minste lovlege plantetal pr. dekar | 150 | 100 | 50 | 150 | 100 | 50 |\n\nMinste lovlege plantetal gjeld berre bartre der bartre utgjer meir enn halvparten av det totale volumet i bestanden før hogst. Lauvtre tel med i andre høve og der det er gitt godkjenning frå kommunen etter [§ 5](forskrift/2006-06-07-593/§5) åttande ledd. Det skal takast omsyn til at det i perioden fram til forynginga er etablert, kan skje både avgang og oppslag av nye planter. Forynginga er etablert når konkurransen frå anna vegetasjon minkar og konkurransen mellom planter av teljande treslag gjer seg gjeldande.\n\n> Endra ved [forskrift 25 sep 2023 nr. 1473](forskrift/2023-09-25-1473) (i kraft 1 jan 2024).\n\n### § 8. Pålegg om forynging\n\nDersom kommunen finn at forynginga ikkje er tilfredsstillande, og godkjenning etter [§ 5](forskrift/2006-06-07-593/§5) åttande ledd ikkje er gitt, avgjer kommunen om skogeigar skal påleggjast å setje i verk tiltak for å sikre at arealet blir forynga, jf. [skogbrukslova § 6](lov/2005-05-27-31/§6) tredje ledd.\n\nPålegg skal varslast i tråd med [forvaltningslova § 16](lov/1967-02-10/§16). Kommunen kan berre gi pålegg om å forynge med treslag som har sitt nåverande eller historiske naturlege utbreiingsområde i Noreg. Pålegget må stå i rimeleg forhold til lønnsemda.\n\n> Endra ved [forskrift 25 sep 2023 nr. 1473](forskrift/2023-09-25-1473) (i kraft 1 jan 2024).\n\n## Kapittel 4. Tiltak mot skadar på skog\n\n### § 9. Hovudprinsipp\n\nSkogeigar er ansvarleg for at hogst, framdrift, behandling av hogstavfall, ungskogpleie og andre tiltak blir gjennomførte på ein slik måte at det ikkje oppstår fare for insektskadar eller andre skadar på skog.\n\nFøresegnene i dette kapittel gjeld også for skog og tre i område som er utanfor virkefeltet i [§ 2 i skogbrukslova](lov/2005-05-27-31/§2), og for plassar og terminalar der virke blir samla eller lagra.\n\n### § 10. Overvaking av skogens helsetilstand\n\nKommunen skal overvake skogen av omsyn til fare for ulike skogskadar. I denne samanheng kan departementet påleggje kommunen å utarbeide oversikter og rapportar om skogen sin helsetilstand, og om resultata av dei tiltaka som blir sette i verk i medhald av denne forskrifta.\n\nDepartementet eller den det gir fullmakt kan gi nærare regler for spesielle oppgåver knytt til overvaking av skog.\n\n### § 11. Førebyggjande tiltak\n\nNår ein skogeigar har fått varsel om at det er risiko for sverming av skadeinsekt i eit område, skal ungskogpleie og tynningshogster gjennomførast etter at svermeperioden er avslutta. I ein slik situasjon skal også ferskt bartrevirke som bult, stammer og grove toppar transporterast ut av skogen eller gjerast uegna som ynglemateriale for insekt som kan skade skog.\n\nNår skog er skada som følgje av storm, tørke, skogbrann, snøbrekk o.l. og det er gitt varsel om at det er risiko for insektsverming eller soppangrep, skal skogeigarar i vedkommande område sørgje for at nødvendige hogstar og oppryddingstiltak mv. blir gjennomførte så raskt som mogleg.\n\nTerminalar med tømmer kan bli kravd overvaka med tanke på risiko for spreiing av skadegjerarar. Eigaren av tømmeret er ansvarleg for slik overvaking.\n\nStatsforvaltaren kan fastsetje fristar og nærare reglar for det som er nemnd i 1.-3. ledd.\n\n> Endra ved [forskrift 21 des 2020 nr. 3044](forskrift/2020-12-21-3044) (i kraft 1 jan 2021).\n\n### § 12. Transport og behandling av virke\n\nBartrevirke som skal transporterast bort frå skogen og staden for levering av virke (jf. [§ 11](forskrift/2006-06-07-593/§11), 2. og 3. ledd), må transporterast ut før insekt som kan gjere skade på skog klekkjast. Gran hogd før 1. juli skal være transportert bort frå staden for levering innan 15. juli, og furu hogd før 1. juni skal være transportert bort innan 1. juli. Gran som blir hogd i juli og furu som blir hogd i juni, skal transporterast bort innan 4 veker.\n\nStatsforvaltaren kan gi nærare reglar med m.a. konkrete fristar for uttransport av virke innafor heile eller delar av fylket.\n\n> Endra ved [forskrift 21 des 2020 nr. 3044](forskrift/2020-12-21-3044) (i kraft 1 jan 2021).\n\n### § 13. Førebyggjande behandling av virke\n\nVirke som blir behandla eller lagra slik at det blir uegna som ynglemateriale for insekt som kan gjere skade på skog, er unnteke frå [§ 12](forskrift/2006-06-07-593/§12), dersom eitt eller fleire av følgjande tiltak er sett i verk:\n\n1. Barking.\n2. Lagring i vatn. Ved bunting må den delen av virket som ligg over vatn overrislast.\n3. Overrisling.\n4. Tildekking av velter. Granvirke kan lagrast såframt dei 3 øvste virkeslaga er dekt med f.eks. plastduk før insektsverming.\n5. Veltesskrelling. Granvirke kan lagrast såframt dei 3 øvste virkeslaga blir kjørt bort eller barka etter insektsverming, men før 15. juli.\n6. Behandling med godkjende preparat (insekticider). Godkjende preparat skal berre brukast i unntakstilfelle, og må ikkje påførast virke som skal fløytast, overrislast, lagrast i vatn eller trommelbarkast. Virke hogd før 1. mai må vere behandla innan denne dato. Seinare hogd virke må behandlast innan ei veke.\n\n### § 14. Pålegg om tiltak\n\nKommunen kan påleggje skogeigar eller eigar av tømmer å gjennomføre hogst, utdrift, behandling av virke eller andre tiltak for å hindre omfattande skogskadar. Når det er nødvendig for samordninga av tiltak i fleire kommunar eller fylke kan departementet eller den det gir fullmakt gi pålegg etter denne føresegna.\n\nOmsynet til biologisk mangfald, landskap og friluftsliv skal vurderast før eventuelle pålegg blir gitt, og ved gjennomføring av tiltak mot skogskadar.\n\nKjøparar av det virket som skogbruksstyresmakta har pålagt hogd, skal sørgje for at dette blir prioritert ved transport inn til industri og virkesterminal dersom behandling av virke etter [§ 13](forskrift/2006-06-07-593/§13), ikkje er utført.\n\n## Kapittel 5. Avsluttande føresegner\n\n### § 15. Tilsyn og opprettande tiltak\n\nKommunen skal føre tilsyn med at føresegnene i denne forskrifta og vedtak fatta med heimel i den blir følgt.\n\nKommunen skal ved stikkprøver kontrollere om nødvendige foryngingstiltak er gjennomførde og om forynginga er tilfredsstillande etablert, jf. [§ 7](forskrift/2006-06-07-593/§7) og [§ 8](forskrift/2006-06-07-593/§8). Statsforvaltaren kan gi utfyllande retningsliner for slik kontroll.\n\nDersom eit skogbrukstiltak har ført med seg vesentlege skadar for naturmiljøet eller friluftslivet, kan kommunen påleggje skogeigaren å utføre opprettande tiltak.\n\n> Endra ved [forskrift 21 des 2020 nr. 3044](forskrift/2020-12-21-3044) (i kraft 1 jan 2021).\n\n### § 16. Dispensasjon\n\nKommunen kan dispensere frå føresegnene i forskrifta dersom særlege skog- eller miljømessige omsyn tilseier det.\n\nKommunen kan setje vilkår for dispensasjonen.\n\n### § 17. Klage\n\nVedtak kommunen gjer etter denne forskrifta kan påklagast til statsforvaltaren.\n\n> Endra ved [forskrift 21 des 2020 nr. 3044](forskrift/2020-12-21-3044) (i kraft 1 jan 2021).\n\n### § 18. Straff\n\nDen som forsettleg eller aktlaust bryt føresegnene i denne forskrifta blir straffa med bøter eller fengsel i inntil eitt år, jf. [§ 22 i skogbrukslova](lov/2005-05-27-31/§22).\n\n> Endra ved [forskrift 1 okt 2015 nr. 1155](forskrift/2015-10-01-1155).\n\n### § 19. Tvangsmulkt\n\nFor å sikre at føresegnene i forskrifta blir følgt, og pålegg gitt med heimel i forskrifta blir gjennomførte, kan kommunen påleggje skogeigarar tvangsmulkt slik det er fastsett i [§ 23 i skogbrukslova](lov/2005-05-27-31/§23).\n\n### § 20. Iverksetjing\n\nForskrifta tek til å gjelde frå 1. juli 2006.\n\nFrå same tid held [forskrift 7. april 1997 nr. 1513 om tiltak mot insektskader m.v. på skog](forskrift/1997-04-07-1513), opp å gjelde.\n",
 "title": "Forskrift om berekraftig skogbruk",
 "type": "forskrift"
}