{
 "canonical_id": "sf-20220921-1627",
 "canonical_url": "https://lovspor.no/forskrift/forskrift-om-fartøy-som-blir-brukte-av-opplæringsinstitusjonar/",
 "language": "no",
 "links": {
  "parent": null
 },
 "provenance": {
  "renderer_version": 8,
  "representation_hash": "e74c7e51f4c11cfcbb7750727b79e347c0515f2ccb6cff6b3a18db23029334b6",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "49742d4ff9c2f76afee1fcef2089c0b7bcd25cf67140515170efb8c5a104b2da"
 },
 "ref_id": "forskrift/2022-09-21-1627",
 "schema_version": "1",
 "slug": "forskrift-om-fartøy-som-blir-brukte-av-opplæringsinstitusjonar",
 "source": {
  "dataset": "gjeldende-sentrale-forskrifter",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2022-10-01",
  "last_change_in_force": null,
  "note": "Current corpus state; not an applicability-at-date determination.",
  "status": "current"
 },
 "text": "\n# Forskrift om fartøy som blir brukte av opplæringsinstitusjonar\n\n## Kapittel 1. Generelle reglar\n\n### § 1. Verkeområde\n\nDenne forskrifta gjeld for norske fartøy med største lengd under 24 meter i innanriksfart som opererer i maksimum 15 knop, og som blir brukte av opplæringsinstitusjonar med 35 eller færre personar om bord. Personar om bord som ikkje inngår i bemanninga, skal vere knytte til opplæringsinstitusjonen.\n\nMed opplæringsinstitusjon er meint ein institusjon som er omfatta av [barnehageloven](lov/2005-06-17-64), grunnskuleopplæringa i [opplæringslova](lov/1998-07-17-61), grunnskuleopplæringa i [friskolelova](lov/2003-07-04-84) eller [folkehøyskoleloven](lov/2002-12-06-72).\n\nForskrifta gjeld ikkje for fartøy som fylgjer [forskrift 14. januar 2020 nr. 63 om fartøy under 24 m som fører 12 eller færre passasjerar](forskrift/2020-01-14-63).\n\n### § 2. Reiarlaget si plikt til å sende inn opplysingar\n\nReiarlaget skal registrere opplysingar om verksemda hjå Sjøfartsdirektoratet før aktiviteten startar. Reiarlaget skal stadfeste at krava i denne forskrifta er gjennomgåtte og oppfylte. Registreringa gjeld i eitt år og må fornyast så lenge fartøyet er i drift etter denne forskrifta.\n\n### § 3. Forholdet til andre reglar\n\nPå område der det ikkje er gitt særlege reglar i denne forskrifta, skal fartøy oppfylle krav i andre relevante forskrifter gitt med heimel i [skipssikkerhetsloven](lov/2007-02-16-9).\n\n### § 4. Tryggleiksstyringssystem\n\nReiarlaget skal etablere, gjennomføre og vidareutvikle eit dokumenterbart tryggleiksstyringssystem som minimum inneheld\n\n1. skildring av verksemda og operasjonsområdet med eventuelle beskytta område der fartøy kan søke ly (naudhamner)\n2. skildring av det enkelte fartøyet, under dette tekniske spesifikasjonar, operasjonelle avgrensingar som fylgje av konstruksjonen og utrustinga til fartøyet, og talet på personar fartøyet er konstruert for\n3. rutinar for planlegging av seglas\n4. skildring av risikofaktorar for alle om bord når fartøyet er undervegs eller reiskapar eller utstyr om bord blir brukte, og tiltak for å unngå uønskte hendingar\n5. rutinar for vedlikehald av fartøy og utstyr\n6. beredskapsplan til bruk i ulike naudssituasjonar og rutinar for øvingar.\n\nReiarlaget skal ha ein årleg gjennomgang av tryggleiksstyringssystemet for å vurdere om det fungerer i tråd med føremålet, og om det er behov for forbetringar. Gjennomgangen skal dokumenterast.\n\nTryggleiksstyringssystemet skal vere tilgjengeleg om bord.\n\n### § 5. Tryggleiksorientering\n\nFør avgang skal alle om bord på fartøyet få ei tryggleiksorientering som er tilpassa føremålet med turen. Tryggleiksorienteringa skal som eit minimum gi informasjon om bruk av redningsmiddel, om korleis personane om bord skal opptre i ein naudssituasjon, og om særskilde risikoar.\n\nTryggleiksorienteringa skal vere på eit språk alle om bord forstår.\n\n### § 6. Teljing og registrering av personar om bord\n\nFør kvar avgang skal talet på personar om bord registrerast hjå kontaktperson på land. Dersom reisa inkluderer overnatting, skal det i tillegg registrerast namn på alle om bord.\n\nOpplysingane som det er krav om etter første og andre ledd, skal gjerast tilgjengelege for redningstenesta i samband med søk og redning. Namnelister skal oppbevarast og slettast i samsvar med personvernregelverket.\n\n### § 7. CE-merka fartøy\n\nFor fartøy som er CE-merka i samsvar med [forskrift 15. januar 2016 nr. 35 om produksjon og omsetning av fritidsfartøy og vannscootere mv.](forskrift/2016-01-15-35), gjeld ikkje [§ 8](forskrift/2016-01-15-35/§8) til [§ 16](forskrift/2016-01-15-35/§16).\n\nFor fartøy i første ledd skal avgrensingane som fylgjer av konstruksjonskategorien og talet på personar fartøyet er konstruert for, ikkje overskridast.\n\n### § 8. Teknisk tryggleik\n\nFartøy med største lengd under 15 meter skal oppfylle Nordisk båtstandard 1990 for yrkesbåter under 15 meter (NBSY), inkludert kapittel Y31 Passasjerbåttillegg, eller ein standard som gir tilsvarande tryggleik.\n\nFartøy med største lengd 15 meter eller meir skal oppfylle DNV Craft eller ein standard som gir tilsvarande tryggleik.\n\nFartøy i fartsområde 4 og større skal ha faste sitjeplassar i innvendige opphaldsrom til alle om bord.\n\n### § 9. Automatisk naudstopp\n\nFartøy som har utvendig styreposisjon og berre éin person i bemanninga, skal vere utstyrte med automatisk naudstopp som stoppar framdriftsmaskineriet dersom føraren fell over bord.\n\n## Kapittel 2. Stabilitet\n\n### § 10. Krav til krengjeprøve\n\nPå fartøy med største lengd under 15 meter kan det i staden for å fylgje krava i NBSY Y3.3 og Y3.4 gjennomførast praktisk krengjeprøve med vekter om bord som svarar til det største talet på personar og last som fartøyet kan ha om bord. Når alle vekter er plasserte på den eine sida av fartøyet på minst gunstige måte, skal krengjevinkelen ikkje vere større enn 10 grader. Krenginga skal ikkje føre til reduksjon i fribordet på meir enn halve fribordet for fartøy som ikkje krengjer. Når endringar på fartøyet påverkar stabiliteten til fartøyet skal reiarlaget gjennomføre ny praktisk krengjeprøve.\n\nPå fartøy med største lengd 15 meter eller meir skal det gjennomførast krengjeprøve for å fastsetje lettskipsdata.\n\nKrengjeprøva skal bestillast elektronisk og gjennomførast med inspektør frå Sjøfartsdirektoratet til stades.\n\n### § 11. Krav til stabilitetsutrekningar\n\nFartøy med største lengd 15 meter eller meir skal ha stabilitetsutrekningar som viser følgjande:\n\n1. Arealet under kurva for rettande arm (GZ-kurva) er minst 0,055 meterradianar opp til krengjevinkel på 30 grader og minst 0,09 meterradianar regnet opp til 40 grader eller fyllingsvinkelen, dersom denne er mindre enn 40 grader. I tillegg skal arealet under GZ-kurva mellom krengjevinklane 30 grader og 40 grader eller mellom 30 grader og fyllingsvinkelen, dersom denne er mindre enn 40 grader, ikkje vere mindre enn 0,03 meterradianar.\n2. Rettande arm (GZ) er minst 0,2 meter ved ein krengjevinkel lik eller større enn 30 grader.\n3. Krengjevinkelen til den rettande arm som har størst verdi (GZmaks) skal være større enn 25 grader.\n4. Initialmetasenterhøgda (GM) er minst 0,15 meter.\n\nFørste ledd gjeld ikkje fartøy i fartsområde 2 og mindre når initialmetasenterhøgda (GM) er minst 0,15 meter og arealet under kurva for rettande arm (GZ-kurva) for lastetilstandane er minst 0,055 meterradianar rekna til fyllingsvinkelen, eller til krengjing på 20 grader når fyllingsvinkelen er større.\n\nFartøy med største lengd 15 meter eller meir skal ikkje ha krengjevinkel på meir enn 10 grader når alle passasjerane er plasserte på eine sida av fartøyet på minst gunstige måte.\n\n### § 12. Krav til nye stabilitetsutrekningar\n\nNår endringar på fartøyet påverkar oppdrifta til fartøyet slik at hydrostatikk og KY-verdiar blir endra, skal reiarlaget utarbeide nye stabilitetsutrekningar.\n\nFartøy som blir endra ved reparasjon, ombygging eller utrusting slik at stabiliteten til fartøyet blir påverka, skal som eit minimum oppfylle dei krava til stabilitet som gjaldt før fartøyet blei endra.\n\nVed omfattande endring grunna reparasjon, ombygging eller endring av utrusting skal fartøyet oppfylle krava til stabilitet som gjeld for nye fartøy på tidspunktet for endringa.\n\nDersom det er tvil om stabiliteten til eit fartøy, kan Sjøfartsdirektoratet krevje at det blir sendt inn stabilitetsutrekningar og gjennomført ny krengjeprøve.\n\n## Kapittel 3. Brannsikring\n\n### § 13. Gassalarm\n\nFartøy med fastmontert gassanlegg om bord skal ha gassalarm nær botnen av fartøyet.\n\n### § 14. Branndeteksjon på fartøy under 15 meter\n\nDet skal vere varme- eller røykdetektor i alle innvendige opphaldsrom og maskinrom. Når ein detektor blir utløyst, skal det vere lydalarm i alle rom.\n\n### § 15. Berbare brannsløkkingsapparat\n\nDet skal vere brannsløkkingsutstyr som svarer til den mogelege brannfaren.\n\nDet skal minst vere\n\n1. eitt brannsløkkingsapparat i maskinrom og rom med stor brannfare\n2. to brannsløkkingsapparat fordelt på opphaldsromma om bord i fartøy med største lengd mellom 8 og 15 meter\n3. tre brannsløkkingsapparat fordelt på opphaldsromma om bord i fartøy med største lengd over 15 meter.\n\nBrannsløkkingsapparata skal vere minst seks kilo og utstyrte med manometer.\n\nApparat skal vere plasserte lett tilgjengeleg og nær inngangen til rommet der dei er plasserte.\n\nBrannsløkkingsapparat som kan bli utsette for frost, skal vere frostsikre.\n\n### § 16. Brannpumpe, brannslangar og strålerøyr på fartøy på 15 meter eller meir\n\nFartøy med største lengd 15 meter eller meir skal vere utstyrte med brannpumpe. Brannpumpa kan vere driven av hovudmotor. Brannpumpa skal ha kapasitet på minst 80 liter per minutt.\n\nFartøy med brannpumpe installert skal ha brannslange som skal kunne nå over heile fartøyet, og vere utstyrt med strålerøyr.\n\n## Kapittel 4. Redningsmiddel\n\n### § 17. Redningsvestar og termiske drakter\n\nFartøyet skal ha termiske drakter (TPA) og redningsvestar i passande storleik til alle om bord. Redningsvestane skal vere CE-godkjende i samsvar med ISO 12402-4. Flyteplagg og termiske drakter skal oppbevarast lett tilgjengeleg om bord.\n\n### § 18. Redningsflåtar\n\nFartøyet skal ha redningsflåtar med samla kapasitet til alle om bord sjølv om éin redningsflåte skulle gå tapt eller bli ubrukeleg.\n\nRedningsflåtane skal vere CE-godkjende i samsvar med ISO 9650-1.\n\nRedningsflåtar skal vere stua i samsvar med produsenten si tilråding og skal kunne fortøyast til innskipingsstasjonar på ein forsvarleg måte.\n\nFartøy med største lengd under 8 meter som går i fartsområde 1 eller mindre i perioden 1. april til 30. september, treng ikkje å ha redningsflåtar dersom alle om bord har på seg redningsvestar som nemnt i [§ 17](forskrift/2022-09-21-1627/§17).\n\n### § 19. Fall over bord\n\nFor å handtere ein fall-over-bord-situasjon skal fartøyet ha\n\n1. ei innretning som gjer det mogleg å plukke opp ein hjelpelaus person frå vatnet\n2. ei livbøye med flytande redningsline og ei livbøye med sjølvtennande lys\n3. manøvreringseigenskapar til å gå nær opp til og ta om bord personar på ein sikker måte frå sjøen under alle forhold\n4. ei løfteinnretning dersom fribordet er over 1 meter. Innretninga skal vere plassert lett tilgjengeleg, og vere dimensjonert for statisk last på minst 200 kg\n5. fastmontert redningsstige som enkelt kan løysast ut av ein person som ligg i vatnet.\n\n### § 20. Førstehjelpsutstyr\n\nFartøyet skal ha naudsynt førstehjelpsutstyr om bord.\n\n### § 21. Beredskap, alarminstruks og øvingar\n\nAlle redningsmiddel skal vere klare til omgåande bruk medan fartøyet er undervegs.\n\nReiarlaget skal etablere klare instruksjonar for besetninga som skal fylgjast om ein naudssituasjon oppstår.\n\nAlle besetningsmedlemmar skal delta i øvingar i bruk av redningsmiddel og brannsløkkingsutstyr kvar månad og i øvingar i førstehjelp kvart år.\n\nReiarlaget skal utarbeide ei opplæringshandbok som på ein lett forståeleg måte gir instruksar og informasjon om redningsreiskapane om bord og dei beste overlevingsmetodane.\n\n## Kapittel 5. Kommunikasjon og navigasjon\n\n### § 22. Radioutstyr\n\nFartøy i fartsområde 1 eller større skal vere utstyrte med VHF-radioutstyr med DSC, tilkopla posisjonsmottakar. I fartsområde 4 eller større skal VHF/DSC vere fastmontert.\n\nFartøy i fartsområde 1 eller større skal vere utstyrte med éin handhalden VHF for kvar redningsflåte fartøyet fører.\n\nElektriske kraftkjelder som driv radioutstyr skal ha kapasitet til å drive utstyret under heile reisa, og i tillegg ha ein reservekapasitet på minst 6 timar.\n\nRadioutstyret skal vere CE-merka.\n\n### § 23. Satellitt-naudpeilesendar (EPIRB)\n\nFartøy i fartsområde 4 eller større skal vere utstyrte med fri-flyt satellitt-naudpeilesendar (EPIRB).\n\nEPIRB skal vere montert slik at han vil flyte opp til overflata og sende naudalarm dersom fartøyet skulle søkke.\n\nPå fartøy utan overbygning kan ein manuell EPIRB erstatte ein fri-flyt EPIRB.\n\n### § 24. Radartransponder (Radar-SART) eller AIS-transponder (AIS-SART)\n\nFartøy i fartsområde 4 eller større skal vere utstyrte med radartransponder (Radar-SART) eller AIS-transponder (AIS-SART). Transponderen skal vere plassert nær styreposisjonen, slik at den lett kan bli aktivert og er enkel å ta med i ein redningsfarkost.\n\n### § 25. Navigasjons- og vêrvarsel\n\nFartøy skal vere utstyrte for å kunne ta i mot oppdaterte navigasjons- og vêrvarsel for heile den planlagde reisa.\n\n### § 26. Navigasjon\n\nAlle fartøy skal vere utstyrte med\n\n1. mottakar for globalt satellittnavigasjonssystem\n2. fastmontert magnetkompass\n3. ekkolodd\n4. radarreflektor.\n\nFartøy med største lengd 15 meter eller meir skal i tillegg vere utstyrte med\n\n1. radar\n2. automatisk identifikasjonssystem (AIS) klasse B med sendar og mottakar. AIS skal alltid vere i drift når fartøyet er undervegs.\n\nElektriske kraftkjelder som driv navigasjonsutstyr skal ha kapasitet til å drive utstyret under heile reisa, og i tillegg ha ein reservekapasitet på minst 6 timar.\n\nReiser skal planleggast ved hjelp av oppdaterte offisielle sjøkart og nautiske publikasjonar og med omsyn til vêr- og bølgjevarslar.\n\nOppdaterte offisielle sjøkart skal finnast om bord.\n\nSkipsførar skal overvake kursen og posisjonen til fartøyet for å sikre at fartøyet fylgjer den planlagde ruta.\n\n### § 27. Føring av dagbok\n\nSkipsførar skal føre dagbok med opplysingar om kvar enkelt reise og om hendingar undervegs som kan vere til nytte for styresmakter eller andre med rettsleg interesse i reisa. Dagboka skal innehalde opplysingar om\n\n1. avgangs- og innkomsttid\n2. vêr- og bølgjeforhold\n3. øvingar\n4. hendingsgang ved ulukker og personskadar\n5. namn på skipsførar og besetningsmedlemmar.\n\n## Kapittel 6. Kvalifikasjonar og bemanning\n\n### § 28. Kvalifikasjonskrav og bemanning\n\nFørar skal vere minst 20 år og ha\n\n1. fritidsskippersertifikat (D5L)\n2. helseerklæring for fritidsskipper som skal fornyast kvart tredje år\n3. SRC-sertifikat\n4. minst 150 timar dokumentert fartstid på tilsvarande fartøytype\n5. godkjent tryggleiksopplæringskurs for sjøfolk på mindre skip\n6. gjennomgått tryggleiksfamiliarisering og intern tryggleiksopplæring som sikrar forsvarleg handtering av personar om bord i naudssituasjonar.\n\nFor kvar redningsflåte om bord, med unntak av den eller dei redningsflåtane som er i reserve, skal det i tillegg til førar vere minst eitt besetningsmedlem som har opplæring som nemnt i første ledd bokstav e.\n\nReiarlaget skal fastsetje ei bemanning som er tilstrekkeleg til å vareta forsvarleg drift av fartøyet og tryggleiken til alle personar om bord ved normal drift og i ein naudssituasjon. Bemanninga skal vere tilstrekkeleg til å handtere segl og rigg utan hjelp frå andre personar om bord. Personar som er ein del av bemanninga, skal oppfylle krava i første ledd bokstav f.\n\n## Kapittel 7. Vedlikehald\n\n### § 29. Vedlikehald av fartøy og utstyr\n\nFartøyet skal haldast ved like på ein slik måte at tryggleiken for liv og helse, miljø og materielle verdiar er vareteken.\n\nReiarlaget skal ha rutinar for visuell kontroll av alt rednings- og førstehjelpsutstyr før kvar tur.\n\nReiarlaget skal ha rutinar for ettersyn og vedlikehald av brannsløkkingsutstyr og rednings- og førstehjelpsutstyr minst éin gong kvar månad eller i samsvar med produsenten si tilråding.\n\nReiarlaget skal ha rutinar for ettersyn og vedlikehald av anna utstyr om bord i samsvar med produsenten si tilråding.\n\nOppblåsbare redningsmiddel skal kontrollerast ved ein godkjent servicestasjon minst kvart tredje år.\n\n## Kapittel 8. Avsluttande reglar\n\n### § 30. Dispensasjon\n\nSjøfartsdirektoratet kan etter skriftleg søknad gi dispensasjon frå krav i forskrifta. Spesielle grunnar må gjere dispensasjonen naudsynt, og dispensasjonen må vere tryggleiksmessig forsvarleg.\n\n### § 31. Iverksetjing\n\nForskrifta trer i kraft 1. oktober 2022.\n\nFartøy som har vore brukte av opplæringsinstitusjonar før iverksetjing av denne forskrifta treng ikkje å oppfylle forskrifta før 1. april 2023.\n\n### § 32. Endring i annan forskrift\n\nFrå 1. oktober 2022 blir det gjort følgande endring i [forskrift 22. desember 2014 nr. 1893 om tilsyn og sertifikat for norske skip og flyttbare innretninger § 20](forskrift/2014-12-22-1893/§20): – – –\n",
 "title": "Forskrift om fartøy som blir brukte av opplæringsinstitusjonar",
 "type": "forskrift"
}