{
 "canonical_id": "sf-20110211-0138",
 "canonical_url": "https://lovspor.no/forskrift/forskrift-om-saksbehandling-i-odelssaker/",
 "language": "no",
 "links": {
  "parent": null
 },
 "provenance": {
  "renderer_version": 8,
  "representation_hash": "86de6ffa98933a5719d9d4d8597ff451b91bd623d732e698e50030f77aa86808",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "fd11b2782f1951ec0863e12d07490261d519a94f170b86401758f296ce68fefa"
 },
 "ref_id": "forskrift/2011-02-11-138",
 "schema_version": "1",
 "slug": "forskrift-om-saksbehandling-i-odelssaker",
 "source": {
  "dataset": "gjeldende-sentrale-forskrifter",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2011-02-11",
  "last_change_in_force": "2021-01-01",
  "note": "Current corpus state; not an applicability-at-date determination.",
  "status": "current"
 },
 "text": "\n# Forskrift om saksbehandling i saker om odelsfrigjering etter odelslova § 30 og § 32\n\n## § 1. Formål og virkeområde\n\nDenne forskrifta har til formål å sikre effektiv og forsvarleg saksbehandling i saker om odelsfrigjering etter [lov 28. juni 1974 nr. 58](lov/1974-06-28-58) om odelsretten og åsetesretten (heretter kalla odl.) [§ 30](lov/1974-06-28-58/§30) og [§ 32](lov/1974-06-28-58/§32).\n\n> Endra ved [forskrift 12 des 2013 nr. 1496](forskrift/2013-12-12-1496) (i kraft 1 jan 2014).\n\n## § 2. Definisjonar\n\nI denne forskrifta tyder:\n\n1. *odelseigedom:* den eigedom som det blir søkt om odelsfrigjering av.\n2. *odelsfrigjering:* eit vedtak som inneber at kvar og ein av odelsrettshavarane på tidspunktet for vedtaket, misser sin odelsrett.\n3. *odelsfrigjerar:* den som har søkt om odelsfrigjering etter [odl. § 30](lov/1974-06-28-58/§30) eller [§ 32](lov/1974-06-28-58/§32).\n4. *odelsløysar:* den som har teke ut stemning mot eigaren etter [odl. § 60](lov/1974-06-28-58/§60).\n5. *odelsrettshavar:* den som har odelsrett til eigedomen.\n\n> Endra ved [forskrift 12 des 2013 nr. 1496](forskrift/2013-12-12-1496) (i kraft 1 jan 2014).\n\n## § 3. Generelle krav til søknad om odelsfrigjering\n\nSkriftleg søknad om odelsfrigjering etter [odl. § 30](lov/1974-06-28-58/§30) og [§ 32](lov/1974-06-28-58/§32) skal sendast til kommunen der odelseigedomen ligg. Kopi av odelsfrigjeraren sitt ervervsdokument med løyver og forkynt stemning i odelsløysingssaka skal leggjast ved søknaden. Søknaden skal innehalde opplysningar om kva som er formålet med odelsfrigjeringa.\n\nDersom kommunen eigedomen ligg i står som odelsfrigjerar, skal saka etter vanleg saksførebuing, jf. [forskrift 8. desember 2003 nr. 1480](forskrift/2003-12-08-1480) om saksbehandling mv. i kommunen i saker etter konsesjonsloven, jordloven, odelsloven og [skogbruksloven § 1](lov/2005-05-27-31/§1), sendast til Statsforvaltaren som avgjer om det skal takast steg til odelsfrigjering.\n\n> Endra ved [forskrifter 12 des 2013 nr. 1496](forskrift/2013-12-12-1496) (i kraft 1 jan 2014), [21 des 2020 nr. 3044](forskrift/2020-12-21-3044) (i kraft 1 jan 2021).\n\n## § 4. (Oppheva 1 jan 2014 ved [forskrift 12 des 2013 nr. 1496](forskrift/2013-12-12-1496).)\n\n## § 5. Frist for å søkje om odelsfrigjering\n\nSøknad om odelsfrigjering etter [odl. § 30](lov/1974-06-28-58/§30) og [§ 32](lov/1974-06-28-58/§32) må setjast fram innan to månader etter at stemning i løysingssak blei forkynt for eigaren. Kommunen kan gi oppfrisking for oversitting av fristen.\n\n> Endra ved [forskrift 12 des 2013 nr. 1496](forskrift/2013-12-12-1496) (i kraft 1 jan 2014).\n\n## § 6. Varsling av odelsrettshavarane om deira rett til å gi uttale\n\nKommunen skal straks søknaden er motteke, så langt det lar seg gjere, gi odelsrettshavarane høve til å uttale seg om odelsfrigjeringsspørsmålet.\n\nOverfor den som det er vanskeleg å gi individuelt varsel, er det nok med kunngjering i Norsk Lysingsblad og i ei avis som er ålment lesen på staden.\n\n## § 7. Frist for odelsrettshavarane til å gi uttale\n\nKommunen skal setje ein uttalefrist på ein månad. Denne fristen skal gjelde både for den som får individuelt varsel og den som får varsel gjennom kunngjering som nemnt i [§ 6](forskrift/2011-02-11-138/§6) andre ledd.\n\nKommunen skal be odelsrettshavarane om å sende uttalen til kommunen.\n\n## § 8. Kommunen si plikt til å innhente opplysningar\n\nKommunen skal innhente opplysningar som ikkje går fram av odelsfrigjeringssøknaden når opplysningane kan ha noko å seie for avgjerda i saka.\n\n## § 9. Kommunen skal vurdere om det skal takast steg til odelsfrigjering og varsle retten\n\nNår kommunen meiner saka er godt nok opplyst, skal den utan ugrunna opphald avgjere om det skal takast steg til odelsfrigjering.\n\nI alle saker etter [odl. § 30](lov/1974-06-28-58/§30) og [§ 32](lov/1974-06-28-58/§32) skal kommunen kontrollere om søknad om odelsfrigjering er sett fram av eigaren innan [2](lov/1974-06-28-58/§2) månader rekna frå stemning i løysingssaka blei forkynt for han.\n\nGjeld søknaden odelsfrigjering etter [odl. § 30](lov/1974-06-28-58/§30), skal kommunen vurdere om\n\n1. den aktuelle eigedomen er odelsjord, og om\n2. staten eller ein kommune har teke over, eller vil ta over slik jord.\n\nGjeld søknaden odelsfrigjering etter [odl. § 32](lov/1974-06-28-58/§32) andre ledd, skal kommunen vurdere om\n\n1. nokon friviljug har «late frå seg odelsjord»,\n2. overtakar har søkt om odelsfrigjering.\n\nKjem kommunen til at vilkåra er oppfylte for den aktuelle søknaden, skal kommunen varsle retten om at det vil bli teke steg til odelsfrigjering, og be om at løysingssaka blir stansa, jf. [odl. § 33](lov/1974-06-28-58/§33) andre ledd. Kommunen skal varsle partane om at det vil bli teke steg til odelsfrigjering og at løysingssaka blir stansa.\n\nKjem kommunen til at vilkåra ikkje er oppfylte, skal kommunen avslå søknaden om odelsfrigjering. Avslaget kan påklagast til Statsforvaltaren.\n\n> Endra ved [forskrifter 12 des 2013 nr. 1496](forskrift/2013-12-12-1496) (i kraft 1 jan 2014), [21 des 2020 nr. 3044](forskrift/2020-12-21-3044) (i kraft 1 jan 2021).\n\n## § 10. Kommunen si uttale når det gjeld spørsmålet om odelsfrigjering (realiteten)\n\nKjem kommunen til at det skal tas steg til odelsfrigjering, skal den gi uttale om sitt syn på spørsmålet om odelsfrigjering (realiteten) og sende saka til Statsforvaltaren. Kommunen skal sende kopi av uttala si til partane og dei andre odelsrettshavarane. Kommunen skal be dei senda sine merknader til uttala til Statsforvaltaren.\n\n> Endra ved forskrift [21 des 2020 nr. 3044](forskrift/2020-12-21-3044) (i kraft 1 jan 2021).\n\n## § 11. Statsforvaltaren si behandling\n\nStatsforvaltaren skal avgjere odelsfrigjeringssøknaden når saka er så godt opplyst som mogleg.\n\nStatsforvaltaren skal innhente uttale i saker etter [odl. § 30](lov/1974-06-28-58/§30) og [§ 32](lov/1974-06-28-58/§32) frå det departementet som odelsfrigjeringsformålet høyrer inn under.\n\nBlir vedtaket påklaga, skal Statsforvaltaren behandle klaga etter reglane i forvaltningslova.\n\nTek ikkje Statsforvaltaren klaga til følgje, skal klagesaka sendast til Landbruksdirektoratet. Landbruksdirektoratet skal foreleggje klaga for det departement som odelsfrigjeringsformålet høyrer inn under.\n\n> Endra ved [forskrifter 22 sep 2014 nr. 1223](forskrift/2014-09-22-1223), [21 des 2020 nr. 3044](forskrift/2020-12-21-3044) (i kraft 1 jan 2021).\n\n## § 12. Varsel til retten om det endelege utfallet av odelsfrigjeringssaka\n\nDet organet som treffer det endelege vedtaket i odelsfrigjeringssaka, skal varsle retten om utfallet av odelsfrigjeringssaka.\n\n## § 13. Ikraftsetjing\n\nDenne forskrifta trer i kraft straks.\n\n## § 14. Overgangsreglar\n\nI tilfelle der nokon som har ein aktuell odelsløysingsrett når forskrifta her tek til å gjelde, går til løysingssak, gjeld likevel dei tidlegare reglane.\n\n> Endra ved [forskrift 12 des 2013 nr. 1496](forskrift/2013-12-12-1496) (i kraft 1 jan 2014).\n",
 "title": "Forskrift om saksbehandling i saker om odelsfrigjering etter odelslova § 30 og § 32",
 "type": "forskrift"
}