{
 "canonical_id": "sf-19900525-4696",
 "canonical_url": "https://lovspor.no/forskrift/instruks-til-pliktavleveringslova/",
 "language": "no",
 "links": {
  "parent": null
 },
 "provenance": {
  "renderer_version": 8,
  "representation_hash": "706ddeeaaa7306d541f2e7c07962cd1145f478c0f4bac8f07d430d940e6df9ac",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "a9663a8394492c1cd86d9789a33beeb9edc43a53de43f5337589482071b7a1e1"
 },
 "ref_id": "forskrift/1990-05-25-4696",
 "schema_version": "1",
 "slug": "instruks-til-pliktavleveringslova",
 "source": {
  "dataset": "gjeldende-sentrale-forskrifter",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "1990-07-01",
  "last_change_in_force": "2008-01-15",
  "note": "Current corpus state; not an applicability-at-date determination.",
  "status": "current"
 },
 "text": "\n# Instruks for institusjonar som forvaltar dokument innkomne etter lov om avleveringsplikt for allment tilgjengelege dokument\n\n## I\n\nMottaksinstitusjonen Nasjonalbiblioteket skal gjennom informasjonstiltak, kontroll- og purrerutinar syta for at avleveringsplikta vert etterlevd.\n\n## II\n\nAv dokument som vert pliktavleverte i sju eksemplar skal Nasjonalbiblioteket vidaresenda mottekne eksemplar til universitetsbiblioteka i Oslo, Bergen, Trondheim og Tromsø, og dessutan til samisk spesialbibliotek i Karasjok når ein monaleg del av innhaldet er på samisk språk.\n\n## III\n\nVidaresendinga skal i regelen skje seinast andre arbeidsdagen etter at eksemplaret er motteke ved Nasjonalbiblioteket, men det kan gjerast avtale mellom Nasjonalbiblioteket og dei aktuelle biblioteka om andre rutinar for vidaresendinga av visse grupper materiale.\n\nNår eitt eller fleire av dei biblioteka som plikteksemplara skal fordelast til, ikkje ynskjer tilsende visse undergrupper av dokument, kan det gjerast avtale mellom vedkomande bibliotek og Nasjonalbiblioteket om dette.\n\n## IV\n\nDersom Nasjonalbiblioteket har motteke færre eksemplar enn dei sju som lova føreskriv, skal dei mottekne eksemplara forvaltast etter denne prioriteringa:\n\n- 1\\. eksemplar er tryggingseksemplar i Nasjonalbiblioteket i Rana\n- 2\\. eksemplar er brukseksemplar i Nasjonalbiblioteket i Oslo\n- 3.-5. eksemplar til universitetsbiblioteka i Bergen, Trondheim og Tromsø med jamnt vekslande priortering.\n- 6\\. eksemplar til Universitetsbiblioteket i Oslo\n- 7\\. eksemplar er fjernlånseksemplar ved Nasjonalbiblioteket i Rana.\n\nSamisk spesialbibliotek i Karasjok skal ha 3. prioritet, med påfølgjande nedprioritering av hine biblioteka, for dei dokumenta som skal sendast dit.\n\n## V\n\nAlle eksemplara av dokument som vert pliktavleverte etter § 7 i lova skal oppbevarast av Nasjonalbiblioteket i eit særskilt avlåst magasin.\n\n## VI\n\nNasjonalbiblioteket i Rana pliktar utan tidsavgrensing å ta vare på eitt eksemplar av alle dokument som tryggingseksemplar.\n\n## VII\n\nNasjonalbiblioteket skal snarast råd registrera dei mottekne dokumenta. Uviktige dokument kan handsamast arkivmessig og ordnast i grupper etter emne og art utan einskildregistrering av kvart dokument.\n\nNasjonalbiblioteket har ansvaret for katalogisering på nasjonalbibliografisk nivå og tilhøyrande katalogprodukt.\n\n## VIII\n\nAlle dei institusjonane som forvaltar eksemplar av pliktavleverte dokument, pliktar å syte for at all bruk skjer innanfor rammene av dei til kvar tid gjeldande opphavsrettsreglar.\n\nAdresse for innsending:\n\nNasjonalbiblioteket\nPliktavlevering\n8607 Mo i Rana\nTlf. 75 12 11 11\nFaks: 75 12 12 22\n",
 "title": "Instruks for institusjonar som forvaltar dokument innkomne etter lov om avleveringsplikt for allment tilgjengelege dokument",
 "type": "forskrift"
}