{
 "canonical_id": "sf-20081017-1119",
 "canonical_url": "https://lovspor.no/forskrift/offentlegforskrifta/",
 "language": "no",
 "links": {
  "parent": null
 },
 "provenance": {
  "renderer_version": 8,
  "representation_hash": "a0bb350dffe0db51cb6df103e8b8535871a8863b9653ee1c788db58060da780d",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "93c8559b3c1762d82ff8fdd450d1c766b130df55d77a2e174928d02a0fe43909"
 },
 "ref_id": "forskrift/2008-10-17-1119",
 "schema_version": "1",
 "slug": "offentlegforskrifta",
 "source": {
  "dataset": "gjeldende-sentrale-forskrifter",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2009-01-01",
  "last_change_in_force": "2022-12-09",
  "note": "Current corpus state; not an applicability-at-date determination.",
  "status": "current"
 },
 "text": "\n# Forskrift til offentleglova (offentlegforskrifta)\n\n## § 1. Unntak frå verkeområdet til offentleglova\n\n[Offentleglova](lov/2006-05-19-16) gjeld ikkje for desse rettssubjekta:\n\n1. Norges sjømatråd AS\n2. SIVA Eigedom Holding AS\n3. Gassco AS\n4. NRK Aktivum AS\n5. Petoro AS\n6. Posten Noreg AS\n7. Statkraft SF\n8. Norsk Tipping AS\n9. Stiftelsen Norsk Rikstoto.\n\n[Offentleglova](lov/2006-05-19-16) gjeld heller ikkje for:\n\n1. sjølvstendige rettssubjekt utan fast tilsette i administrativ stilling\n2. sjølvstendige rettssubjekt som utelukkande har til oppgåve å vareta medlemmene sine interesser som arbeidsgivar eller liknande (interesseorganisasjonar).\n\n[Offentleglova](lov/2006-05-19-16) gjeld ikkje for desse dokumenta hos sjølvstendige rettssubjekt:\n\n1. dokument som gjeld kunstnarleg og fagleg programmering og planlegging av repertoar i kulturinstitusjonar\n2. dokument knytte til formuesforvaltning hos rettssubjekt som har slik forvaltning som føremål\n3. dokument hos arbeidsmarknadsføretak godkjent av Arbeids- og velferdsetaten (NAV) som gjeld enkeltpersonar som får bistand frå føretaket\n4. dokument knytte til sak om kommersiell utnytting av forskingsresultat og sak om bidrags- eller oppdragsforsking i rettssubjekt innanfor universitets- og høgskulesektoren\n5. dokument i sak om søknad om finansiering hos Enova SF\n6. dokument knytte til forvaltning av statens interesser i CO2 -handteringsprosjekt hos Gassnova SF\n7. dokument i sak om søknad om finansiering hos Innovasjon Noreg, med unntak for positive avgjerder, og dokument knytte til Innovasjon Noregs eksportfremmande verksemd og rådgivingsverksemd overfor idéskaparar og oppfinnarar\n8. dokument i saker om finansiering og investering hos Statens investeringsfond for næringsverksemd i utviklingsland (NORFUND)\n9. dokument hos NRK AS som er knytte til redaksjons- og programverksemda i selskapet\n10. dokument hos Statnett SF som kan påverke prisane på kraftmarknaden, inntil opplysningane som går fram av dokumenta er offentleggjorde gjennom formelle kanalar, og dokument hos Statnett SF knytte til internasjonale samarbeidsforhold og kommersielle prosjekt som Statnett SF tek del i\n11. dokument i sak om registrering av domenenamn hos UNINETT Norid AS\n12. korrespondanse mellom NSB AS og dotterselskap av dette selskapet, samt mellom NSB AS og kundar av selskapet.\n\nBokstavane e, h og k gjeld ikkje for positive avgjerder.\n\nParagrafen her gjeld ikkje i saker der eit sjølvstendig rettssubjekt gjer enkeltvedtak eller utferdar forskrift. Føresegnene i [offentleglova § 6](lov/2006-05-19-16/§6), [§ 7](lov/2006-05-19-16/§7) andre ledd, [§ 8](lov/2006-05-19-16/§8) tredje ledd andre punktum, fjerde ledd og femte ledd og [§ 30](lov/2006-05-19-16/§30) fyrste ledd tredje punktum og andre ledd gjeld uavhengig av paragrafen her for alle verksemder som er omfatta av [EØS-avtalen vedlegg XI](avtale/avt-1992-05-02-1-v11) nr. 5k (direktiv [2003/98/EF](eu/32003l0098)) om vidarebruk av informasjon frå offentleg sektor.\n\n> Endra ved [forskrifter 22 juni 2012 nr. 572](forskrift/2012-06-22-572) (i kraft 1 juli 2012), [25 juli 2013 nr. 929](forskrift/2013-07-25-929), [18 juni 2021 nr. 2010](forskrift/2021-06-18-2010) (i kraft 1 juli 2021), [9 des 2022 nr. 2106](forskrift/2022-12-09-2106).\n\n## § 2. Utviding av verkeområdet til offentleglova\n\n[Offentleglova](lov/2006-05-19-16) gjeld for Stiftelsen Nasjonalmuseet for kunst. Lova gjeld likevel berre for dokument som er komne inn til eller som er oppretta av Stiftelsen Nasjonalmuseet for kunst etter at forskrifta her tek til å gjelde.\n\n## § 3. Tilhøvet til rettsstellovene\n\n[Domstollova](lov/1915-08-13-5), [straffeprosesslova](lov/1981-05-22-25), [tvistelova](lov/2005-06-17-90), skilsdomslova [(voldgiftslova)](lov/2004-05-14-25), [tvangsfullføringslova](lov/1992-06-26-86), [skjønnslova](lov/1917-06-01-1), [gjeldsordningslova](lov/1992-07-17-99), [konkurslova](lov/1984-06-08-58), [skiftelova](lov/1930-02-21) og [jordskiftelova](lov/2013-06-21-100) skal reknast som rettsstellover etter [offentleglova § 2](lov/2006-05-19-16/§2) fjerde ledd. [Offentleglova](lov/2006-05-19-16) gjeld for saker om gebyrfastsetjing og om salærfastsetjing til forsvararar, prosessfullmektigar og sakkunnige.\n\n[Offentleglova](lov/2006-05-19-16) gjeld ikkje for gjeremål som Arbeidsretten har etter [arbeidstvistlova andre kapittel](lov/2012-01-27-9/kap2) og tenestetvistlova [sjette kapittel](lov/2012-01-27-9/kap6). Lova gjeld heller ikkje for gjeremål som Rikslønnsnemnda har etter [lønnsnemndlova § 1](lov/2012-01-27-10/§1) andre ledd og tenestetvistlova sjuande kapittel, og gjeremål som Husleigetvistutvalet har i tvistar etter husleigelovene, jf. [husleigelova § 12-5](lov/1999-03-26-17/§12-5).\n\n## § 4. Betaling for innsyn\n\nDet kan krevjast betaling for innsyn i form av vanlege avskrifter, utskrifter eller kopiar til papir, og for utsendinga, når talet overstig hundre ark i A4-format i éi sak. I slike tilfelle kan organet krevje éi krone per ark utover hundre og betaling for kostnadene for heile utsendinga (porto). Dersom same person krev innsyn fleire gonger i same sak kan det takast omsyn til det ved vurderinga opp mot grensa etter fyrste punktum, dersom dei dokumenta som det blir kravd innsyn i låg føre da eit tidlegare innsynskrav vart framsett.\n\nDet kan vidare krevjast betaling for utskrifter eller kopiar til papir når det gjeld uvanlege format, høgkvalitetskopiar eller liknande dersom kostnadene med dette i vesentleg grad overstig kostnadene ved vanleg kopiering. Det same gjeld ved kopiering til anna lagringsmedium enn papir. Betalinga skal ikkje overstige dei faktiske kostnadene organet blir påført. Det kan ikkje takast omsyn til tida som går med til å behandle innsynskrav, skrive ut eller kopiere dokument og til å sende ut dokument. Det kan ikkje krevjast betaling når dokument som alt er tilgjengeleg i elektronisk versjon blir sendt som elektronisk post.\n\nArkivdepot kan krevje betaling for avskrifter, utskrifter og kopiar til papir av arkivmateriale etter satsar fastsette av Kultur- og kyrkjedepartementet. Andre ledd tredje til femte punktum gjeld tilsvarande.\n\nDet kan krevjast betaling for informasjon som blir produsert eller tilarbeidd utelukkande for å dekkje eit behov hos eksterne aktørar. Betalingssatsane skal ikkje overstige kostnadene ved innsamling, produksjon, reproduksjon og formidling av informasjonen, med tillegg av ei rimeleg avkastning av investeringane.\n\nDet kan krevjast betaling for geodata (kart mv.) og eigedomsinformasjon. Betalingssatsane skal vere slik at inntektene ikkje overstig dei faktiske kostnadene ved innsamling, produksjon, reproduksjon og formidling av informasjon. Organ som har utarbeiding og utlevering av geodata eller eigedomsinformasjon som ei hovudoppgåve i si verksemd, kan likevel krevje betaling for informasjon etter fyrste punktum etter slik betalingssats at inntektene tilsvarar dei faktiske kostnadene ved innsamling, produksjon, reproduksjon og formidling av informasjon, med tillegg av ei rimeleg avkastning av investeringane.\n\nOrgan som skal drivast på kommersiell basis, eller som heilt eller dels skal vere sjølvfinansierande, kan ta betaling for informasjon, så langt det er fastsett at betaling for informasjon skal vere ein del av inntektsgrunnlaget til organet. Reglane om betalingssatsar i femte ledd tredje punktum gjeld tilsvarande.\n\nArkiv, bibliotek og museum kan, i tillegg til å krevje betaling som nemnt i andre til femte ledd, krevje betaling for faktiske kostnader til lisensiering og bevaring. Det kan ikkje krevjast betaling for meir enn 20 % av bevaringskostnadene, utanom når behovet for bevaring av dokumentet har oppstått som følgje av ein konkret innsynsførespurnad. Det kan ikkje krevjast betaling for kostnader som gjeld lisensiering eller bevaring meir enn 2 år tilbake i tid.\n\nFøresegnene i paragrafen her eller [offentleglova § 8](lov/2006-05-19-16/§8) gjeld ikkje høvet til å ta betalt for tenester som går ut over innsynsretten etter [offentleglova](lov/2006-05-19-16) eller anna lovgiving.\n\n> Endra ved [forskrift 28 april 2017 nr. 503](forskrift/2017-04-28-503).\n\n## § 5. Unntak frå rett til kopi\n\nDet kan ikkje givast elektronisk kopi av materiale som ein tredjeperson har immaterielle rettar til, så langt materialet har økonomisk verdi, og det medfører fare for at materialet kan bli misbrukt i kommersiell samanheng om kopi blir gitt. Unntaket etter fyrste punktum gjeld ikkje for søknadar, argumentasjonsskriv, høyringsfråsegner og liknande vanleg materiale som blir sendt inn i samband med ei sak.\n\nRetten til kopi gjeld ikkje for journalar og dokument som er avleverte til arkivdepot, og som er i så dårleg stand at dei kan bli skadde eller øydelagde ved kopiering.\n\n## § 6. Tilgjengeleggjering av journalar på Internett\n\nFølgjande organ som fører elektronisk journal, skal gjere journalen tilgjengeleg for ålmenta på Internett:\n\n1. alle departementa og Statsministerens kontor\n2. alle dei statlege direktorata som har heile landet som verkeområde\n3. alle dei statlege tilsyna som har heile landet som verkeområde\n4. statsforvaltarane\n\nPlikta til å gjere journalen tilgjengeleg på Internett omfattar berre den sentrale eininga i eit direktorat eller eit tilsyn som også har regionale einingar. Utanriksdepartementet kan fastsetje at utanriksstasjonar som fører eigen elektronisk journal, skal gjere han tilgjengeleg for ålmenta på Internett. Det overordna departementet avgjer i tvilstilfelle om eit underlagt organ er omfatta av plikta til å gjere journalen tilgjengeleg på Internett.\n\nFølgjande organ er ikkje i noko tilfelle omfatta av plikta til å gjere elektronisk journal tilgjengeleg på Internett:\n\n1. Regjeringsadvokaten\n2. Riksadvokaten\n3. Etterretningstenesta\n4. Politiets tryggingsteneste (PST)\n5. Patentstyret\n6. Nasjonalt tryggingsorgan\n7. Norsk pasientskadeserstatning\n8. Pasientskadenemnda.\n\nInnhaldet i journalar som blir gjorde tilgjengelege på Internett, skal vere i samsvar med [arkivforskrifta § 10](forskrift/2017-12-15-2105/§10) fyrste ledd tredje punktum bokstavane a til e. I tillegg skal journalen opplyse om kontaktpunkt for den enkelte sak hos det aktuelle organet. Når opplysningar ikkje er tekne med i offentleg journal, jf. [arkivforskrifta § 10](forskrift/2017-12-15-2105/§10) andre ledd, skal utelatinga og fullstendig unntaksheimel gå fram av journalen. Dersom det er teke avgjerd om at eit dokument heilt eller dels skal vere unnateke frå innsyn, kan journalen innehalde opplysning om dette i form av fullstendig unntaksheimel og med opplysning om unntaket gjeld heile eller delar av dokumentet.\n\nOpplysningar som er nemnde i [§ 7](forskrift/2008-10-17-1119/§7) andre ledd, skal ikkje gå fram av offentleg elektronisk journal. Slike opplysningar skal heller ikkje gå fram av journal eller liknande register som eit organ som ikkje er omfatta av ordninga etter fyrste ledd gjer tilgjengeleg på Internett. Offentleg elektronisk journal for organ som er omfatta av ordninga etter fyrste ledd, skal innrettast slik at det ikkje skal vere mogleg å få treff på personnamn i innførslar i journalane som er eldre enn eit år.\n\nTrer i kraft når departementet bestemmer.\n\n> Endra ved [forskrifter 15 des 2017 nr. 2105](forskrift/2017-12-15-2105) (i kraft 1 jan 2018), [21 juni 2019 nr. 855](forskrift/2019-06-21-855), [8 okt 2021 nr. 2958](forskrift/2021-10-08-2958) (i kraft 1 nov 2021).\n\n## § 7. Tilgjengeleggjering av dokument på Internett\n\nOrgan som er omfatta av [offentleglova](lov/2006-05-19-16), kan gjere dokument tilgjengelege for ålmenta på Internett.\n\nFølgjande skal ikkje gjerast tilgjengeleg på Internett:\n\n1. opplysningar som er underlagde teieplikt i lov eller i medhald av lov\n2. opplysningar som det kan gjerast unntak frå innsyn for etter [§ 9](forskrift/2008-10-17-1119/§9) i forskrifta her\n3. opplysningar som nemnde i personvernforordninga artikkel 9 og 10\n4. fødselsnummer, personnummer og nummer med tilsvarande funksjon\n5. opplysningar om lønn og godtgjering til fysiske personar, med unntak for opplysningar om lønn og godtgjering til personar i leiande stillingar i det offentlege og i leiande stillingar eller i styret i sjølvstendige rettssubjekt\n6. materiale som ein tredjepart har immaterielle rettar til, med unntak for slikt materiale som er nemnd i [§ 5](forskrift/2008-10-17-1119/§5) fyrste ledd andre punktum og for materiale der rettshavaren samtykkjer til at materialet blir gjort tilgjengeleg.\n\nOrgan som gjer dokument tilgjengeleg for ålmenta på Internett, skal opplyse kva for kriterium som ligg til grunn for utvalet av dokument.\n\n> Endra ved [forskrift 15 juni 2018 nr. 876](forskrift/2018-06-15-876) (i kraft 20 juli 2018).\n\n## § 8. Dokument utarbeidde for eiga saksførebuing (organinterne dokument)\n\nUnntaket i [offentleglova § 14](lov/2006-05-19-16/§14) fyrste ledd for organinterne dokument gjeld ikkje for dokument frå administrasjonen til styret i føretak etter helseføretakslova, dokument frå administrasjonen til kollegial eining ved universitet og høgskular og dokument som blir utveksla mellom fakultet ved universitet og høgskular.\n\n## § 9. Unntak for dokument og journalar\n\nDet kan gjerast unntak frå innsyn i dokument og journalar som er avleverte til arkivdepot når originalane er i så dårleg stand at dei ikkje toler handtering eller kopiering, eller arkivordninga gjer det urimeleg arbeidskrevjande å finne materialet eller å sikre at opplysningar som er underlagde teieplikt eller graderte ikkje blir leverte ut.\n\nDet kan gjerast unntak frå innsyn for tilbod og protokollar i tilbodskonkurransar som gjeld kjøp av flyrutetenester etter regelverk gitt i medhald av [luftfartslova](lov/1993-06-11-101), inntil val av leverandør er gjort.\n\nDet kan gjerast unntak frå innsyn i dokument som gjeld saker hos Etterretningstenesta og hos Politiets tryggingsteneste (PST) og frå innsyn i journalar hos desse organa.\n\nDet kan gjerast unntak frå innsyn for journalinnføringar og dokument i enkeltsaker hos Meklingsnemnda for arbeidstakaroppfinningar, i saker om utferding av lån og garantiar hos Eksportfinansiering Norge og i enkeltsaker etter [utlendingslova](lov/2008-05-15-35), [pasientskadelova](lov/2001-06-15-53) og [statsborgarlova](lov/2005-06-10-51).\n\nDet kan gjerast unntak frå innsyn for journalinnføringar i følgjande sakstypar:\n\n1. enkeltsaker om adopsjon, ekteskap, partnarskap, separasjon, skilsmål, farskap, nedstamming, barnefordeling og bidrag\n2. enkeltsaker som gjeld konsulær bistand frå utanrikstenesta\n3. enkeltsaker etter barnevernlova, [sosialtenestelova](lov/2009-12-18-131), [psykisk helsevernlova](lov/1999-07-02-62) og [verjemålslova](lov/2010-03-26-9).\n\n> Endra ved forskrift [18 juni 2021 nr. 2010](forskrift/2021-06-18-2010) (i kraft 1 juli 2021).\n\n## § 10. Innsyn i graderte dokument\n\nVed krav om innsyn i dokument som inneheld materiale som er påført gradering etter [sikkerhetsloven](lov/2018-06-01-24) eller [beskyttelsesinstruksen](forskrift/1972-03-17-3352), skal spørsmål om avgradering leggjast fram for den som har oppretta dokumentet, for avgjerd i samsvar med [virksomhetsikkerhetsforskriften § 33](forskrift/2018-12-20-2053/§33) eller [beskyttelsesinstruksen § 5](forskrift/1972-03-17-3352/§5). Organet som mottek innsynskravet, kan likevel avslå eit krav om innsyn, utan at spørsmålet om avgradering fyrst har vore lagt fram etter fyrste punktum, dersom\n\n1. det uavhengig av graderinga ikkje skal givast innsyn i dokumentet, eller\n2. det uavhengig av graderinga kan gjerast unntak frå innsyn i dokumentet, og organet som mottek innsynskravet, finn at meirinnsyn ikkje skal givast.\n\nFinn det forvaltningsorganet som mottek kravet, grunn til å tru at det ikkje kan gjerast unntak frå innsyn etter [offentleglova](lov/2006-05-19-16), eller at ei gradering elles ikkje kan oppretthaldast, skal det følgje prosedyren for omgradering som er fastsett i [virksomhetsikkerhetsforskriften § 30](forskrift/2018-12-20-2053/§30) til [§ 32](forskrift/2018-12-20-2053/§32) eller i [beskyttelsesinstruksen § 5](forskrift/1972-03-17-3352/§5).\n\n> Endra ved forskrift [8 jan 2021 nr. 369](forskrift/2021-01-08-369).\n\n## § 11. Klageinstans\n\nDet organet som eit uavhengig forvaltningsorgan administrativt høyrer inn under, er klageinstans når det uavhengige organet tek avgjerder etter [offentleglova](lov/2006-05-19-16).\n\nEit statleg organ som utøver eigarskap til eit sjølvstendig rettssubjekt som nemnt i [offentleglova § 2](lov/2006-05-19-16/§2) fyrste ledd bokstav c, eller står for utveljing av medlemmer til det øvste organet i eit sjølvstendig rettssubjekt som nemnt i [offentleglova § 2](lov/2006-05-19-16/§2) fyrste ledd bokstav d, er klageinstans når det sjølvstendige rettssubjektet tek avgjerder etter [offentleglova](lov/2006-05-19-16). Organet kan i staden bestemme at eit underordna forvaltningsorgan skal vere klageinstans.\n\nDersom ein kommune eller fylkeskommune utøver eigarskap til eit sjølvstendig rettssubjekt som er omfatta av [offentleglova § 2](lov/2006-05-19-16/§2) fyrste ledd bokstav c, eller står for valet av medlemmer til det øvste organet i eit sjølvstendig rettssubjekt som er omfatta av [offentleglova § 2](lov/2006-05-19-16/§2) fyrste ledd bokstav d, er statsforvaltaren klageinstans når det sjølvstendige rettssubjektet tek avgjerder etter [offentleglova](lov/2006-05-19-16). Tilsvarande skal gjelde dersom fleire kommunar, eller ein fylkeskommune og ein eller fleire kommunar, saman utøver eigarskap til, eller saman står for valet av medlemmer til det øvste organet i, eit slikt sjølvstendig rettssubjekt som nemnt i fyrste punktum. Dersom kommunane etter andre punktum tilhøyrer ulike fylke, skal klageinstansen vere statsforvaltaren i det fylket som flest av kommunane tilhøyrer, men dersom ein fylkeskommune inngår i samanslutninga, skal likevel statsforvaltaren i dette fylket alltid vere klageinstans. Er det like mange kommunar som tilhøyrer fleire av dei aktuelle fylka etter tredje punktum, skal statsforvaltarane der bli einige om kven av dei som skal vere klageinstans. Dersom fleire fylkeskommunar saman utøver eigarskap til eit sjølvstendig rettssubjekt som nemnt i fyrste punktum, eller saman står for valet av medlemmer til det øvste organet i eit slikt sjølvstendig rettssubjekt, gjeld fjerde punktum tilsvarande.\n\nStatsforvaltaren er klageinstans når ei lokal gravplasstyresmakt som nemnt i [gravplassloven § 23](lov/1996-06-07-32/§23) første ledd tek avgjerder etter [offentleglova](lov/2006-05-19-16).\n\nKultur- og likestillingsdepartementet er klageinstans dersom Stiftelsen Nasjonalmuseet for kunst, jf. [§ 2](forskrift/2008-10-17-1119/§2), tek avgjerder etter [offentleglova](lov/2006-05-19-16).\n\nSametingsrådet er klageinstans når Sametingets administrasjon tek avgjerder etter [offentleglova](lov/2006-05-19-16).\n\n> Endra ved forskrifter [8 okt 2021 nr. 2958](forskrift/2021-10-08-2958) (i kraft 1 nov 2021), [3 juni 2022 nr. 966](forskrift/2022-06-03-966).\n\n## § 12. Iverksetjing og overgangsreglar\n\nForskrifta gjeld frå 1. januar 2009 med unntak for [§ 6](forskrift/2008-10-17-1119/§6) som gjeld frå den tida Justis- og politidepartementet fastset.\n\nFor organ der det tidlegare kunne gjerast heilt eller delvis unntak frå innsyn i journalen, gir ikkje [offentleglova](lov/2006-05-19-16) rett til innsyn i journalinnførslar som vart gjorde før iverksetjinga.\n\n## § 13. Oppheving av eldre forskrifter\n\nFrå forskrifta tek til å gjelde, blir desse forskriftene oppheva:\n\n1. [Forskrift 14. februar 1986 nr. 351](forskrift/1986-02-14-351) til [offentlighetsloven](forskrift/1986-02-14-351). Delegering av myndighet\n2. [Forskrift 19. desember 1986 nr. 2202](forskrift/1986-12-19-2202) om [offentlighetslovens](lov/2006-05-19-16) anvendelse på dokumenter som ikke er papirbasert\n3. [Forskrift 2. mars 2001 nr. 183](forskrift/2001-03-02-183) om [offentlighetslovens](lov/2006-05-19-16) anvendelse på Statens nærings- og distriktsutviklingsfond\n4. Delegering [30. november 2001 nr. 1322 av](forskrift/2001-11-30-1322) myndighet til Finansdepartementet etter [offentlighetsloven § 2](lov/2006-05-19-16/§2) tredje ledd\n5. [Vedtak 7. oktober 2005 nr. 1116](forskrift/2005-10-07-1116) om Finansdepartementets råd for investeringsstrategi og forholdet til [offentlighetsloven](lov/2006-05-19-16).\n\n## § 14. Endringar i andre forskrifter\n\nFrå forskrifta tek til å gjelde, blir desse endringane gjorde i andre forskrifter: – – –\n",
 "title": "Forskrift til offentleglova (offentlegforskrifta)",
 "type": "forskrift"
}