{
 "canonical_id": "sf-20001220-1394",
 "canonical_url": "https://lovspor.no/forskrift/retningsliner-for-kraftanleggsbeskatning/",
 "language": "no",
 "links": {
  "parent": null
 },
 "provenance": {
  "renderer_version": 8,
  "representation_hash": "e431ad2174c61631d415ca756054306ea74b6654d3774e808f89e1453f9ad350",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "05de40a310111811e613f4d37f1cc3e3ebd291b559380084bcdc467352b6c048"
 },
 "ref_id": "forskrift/2000-12-20-1394",
 "schema_version": "1",
 "slug": "retningsliner-for-kraftanleggsbeskatning",
 "source": {
  "dataset": "gjeldende-sentrale-forskrifter",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": null,
  "last_change_in_force": null,
  "note": "Current corpus state; not an applicability-at-date determination.",
  "status": "current"
 },
 "text": "\n# Retningsliner om grunnlag for og berekning av kommunefordelingsnøklar for grunnlaget for eigedomsskatt for kraftanlegg etter eigedomsskattelova § 8 A-1 første og tredje leden.\n\n## I\n\n### 1. Virkeområde og utgangspunkt\n\nDesse retningslinene skal leggjast til grunn for berekning og fastsetjing av fordelingsnøklar for kommunevis fordeling av eigedomsskattegrunnlag for dei kraftanlegg der kommunefordelinga skal baserast på GAV, jf. [eigedomsskattelova § 8](lov/1975-06-06-29/§8) A-1 første og tredje leden.\n\nRetningslinene gjeld berekning av fordelingsnøklar for alle kraftanlegg med kraftverk med installert effekt over 1.000 kW sett i drift pr. 1. januar 1997, samt kommunekryssande kraftanlegg av tilsvarande storleik som er sett i drift pr. 1. januar 2000. Retningslinene gjeld også for kommunefordeling basert på det gjenanskaffingsverdet (GAV) som vert fastsett av NVE i medhald av § 2 andre leden i [forskrift av 20. desember 2000 nr. 1393](forskrift/2000-12-20-1393) om kommunefordeling av grunnlaget for eigedomsskatt på kraftanlegg.\n\nKommunevis fordeling av samla berekna GAV for særskilte driftsmiddel i kraftanlegg med kraftverk med installert effekt over 1.000 kW, skal baserast på den fysiske plasseringa av dei einskilde driftsmiddel, jf. [punkt 5](forskrift/2000-12-20-1394/kap5) og [6](forskrift/2000-12-20-1394/kap6) nedanfor.\n\nGAV for reguleringsanlegg med tilhøyrande driftsmiddel som er til nytte i fleire kraftverk som ligg nedanfor reguleringsanlegget, skal fordelast mellom alle slike kraftverk basert på den energiekvivalenten til det einskilde kraftverk som er registrert hos NVE pr. 1. januar 2000. Kraftverk med installert effekt mindre enn 1.000 kW skal haldast utanfor denne fordelinga.\n\nDet skal takast omsyn til andel av GAV fastsett pr. 1. januar 1997 av ovanforliggende reguleringsanlegg også for kraftanlegg med kraftverk sett i drift i tida 1. januar 1997 til 1. januar 2000. Andel av GAV av reguleringsanlegg skal bereknast for vedkommande kraftanlegg utifrå kraftverket sin registrerte energiekvivalent hos NVE pr. 1. januar 2000. Dette gjeld likevel berre for kraftverk med installert effekt større enn 1.000 kW, jf. [eigedomsskattelova § 8](lov/1975-06-06-29/§8) A-1 første leden siste punktum, jf. tredje leden siste punktum. Om tilordning av GAV for ulike driftsmiddel som del av reguleringsanlegg eller vassveger, gjeld retningslinene i [punkt](lov/1975-06-06-29/kap4) 4.\n\n### 2. Om NVE si rolle ved berekning av fordelingsnøklar etter eigedomsskattelova § 8 A-1 første og tredje leden\n\nDesse retningslinene skal leggjast til grunn for NVE si rapportering til Skattedirektoratet av fordelingsnøklar for kommunevis fordeling av eigedomsskattegrunnlag for dei kraftanlegg der kommunefordelinga skal baserast på GAV, jf. § 2 i [forskrift av 20. desember 2000 nr. 1393](forskrift/2000-12-20-1393) om kommunefordeling av grunnlaget for eigedomsskatt på kraftanlegg.\n\nEndeleg rapportformat vert utarbeidd i samarbeid med Skattedirektoratet. På førespurnad frå Skattedirektoratet skal NVE leggja fram dokumentasjon av grunnlaget for berekning av kommunefordelingsnøklane.\n\nVed rapportering av fordelingsnøklar for kvart kraftanlegg skal opplysast kven som er eigar av kraftanlegget pr. 31. desember 1999 jf. Skattedirektoratet si liste.\n\n### 3. Definisjonar\n\nMed *GAV* er meint det gjenanskaffingsverdet for særskilte driftsmiddel i kraftanlegg som vart fastsett av NVE i medhald av [forskrift av 20. januar 1997 nr. 79](forskrift/1997-01-20-79) om fastsettelse av skattemessige inngangsverdier pr. 1. januar 1997 for særskilte driftsmiddel i kraftforetak. Med GAV er også meint det berekna gjenanskaffingsverdet som NVE skal fastsetje for visse kraftanlegg i medhald av § 2 andre leden i [forskrift av 20. desember 2000 nr. 1393](forskrift/2000-12-20-1393) om kommunefordeling av grunnlaget for eigedomsskatt på kraftanlegg.\n\nFor kraftanlegg som var sett i drift pr. 1. januar 1997 er berekning av GAV for kraftanlegga sine særskilte driftsmiddel basert på tilhøva pr. 1. januar 1997. Det skal ikkje takast omsyn til eventuelle endringar etter denne tid. For kraftanlegg som vart sett i drift i tida 1. januar 1997 til 1. januar 2000, skal berekninga av GAV baserast på tilhøva pr. 1. januar 2000.\n\nMed *kraftanlegg* er meint «det egentlige produksjonsanlegget – kraftverket/kraftstasjonen – med tilhørende reguleringsanlegg eller andel i slike, med unntak av fjernledninger og fordelingsanlegg», jf. [skatteloven § 18-1](lov/1999-03-26-14/§18-1) andre leden bokstav a, jf. bokstav b. Kraftanlegg med kraftverk med ein samla installert effekt på mindre enn 1.000 kW skal ikkje omfattast.\n\nDei *driftsmiddel* som skal inngå i fordelinga skal i utgangspunktet tilsvara dei driftsmiddel som var omfatta av NVE sine berekningar av GAV etter [forskrift av 20. januar 1997 nr. 79 § 1-1](forskrift/1997-01-20-79/§1-1). I 1997 vart gjenanskaffingsverdet berekna for desse hovudtyper av driftsmiddel i kraftanlegg:\n\n*Kap. 3.0 Overføringer og reguleringsanlegg*\n\n1. Dammar\n2. Vassveger\n3. Hjelpetunnelar\n4. Bekkeinntak med sjakter og tunnelar\n5. Luker og tverrslagsporter\n6. Lukesjakter\n7. Pumper\n\n*Kap. 4.0 Inntak/driftsvassveg*\n\n1. Dammar\n2. Vassveger\n3. Hjelpetunnelar\n4. Bekkeinntak med sjakter og tunnelar\n5. Svingesjakt/trykkluftbasseng\n6. Luker og tverrslagsporter\n7. Lukesjakter\n\n*Kap. 5.0 Kraftstasjonsområdet*\n\n1. Kraftstasjonshall/-bygning med maskinteknisk utstyr\n2. Adkomst- og hjelpetunnelar\n3. Aggregater m/generator\n4. Transformator\n5. Høgspent koblingsanlegg\n6. Kontrollanlegg\n7. Hjelpeanlegg\n8. Kablar\n9. Kraftliner som ikkje reknast til monopoldel\n\n*Kap. 6.0 Adkomstanlegg*\n\n1. Veger med underpunkter for vegtunnelar og bruer\n2. Kaianlegg\n3. Taubaner\n\nGAV for adkomstanlegg skal ikkje inngå i fordelinga, jf. [eigedomsskattelova § 8](lov/1975-06-06-29/§8) A-1 første leden fjerde punkt.\n\nDet vart ikkje berekna GAV for sjølve vassfallet (den rå vasskraft). Vassfall skal ikkje inngå i fordelinga.\n\nMed *reguleringsanlegg* er meint anlegg for regulering av vassføringa i eit vassdrag, jf. [skatteloven § 18-1](lov/1999-03-26-14/§18-1) første leden bokstav c. I eit reguleringsanlegg vil dammar, overføringstunnelar og pumper inngå som særskilde driftsmiddel knytta til reguleringsanlegget.\n\n### 4. Retningsliner om tilordning av GAV for driftsmiddel i de ulike kategoriar nemnt i punkt 3 som reguleringsanlegg eller vassveger\n\nVed innrapportering av tekniske data etter forskrift av [20. januar 1997 nr. 79](forskrift/1997-01-20-79), skulle overførings- og reguleringsanlegg førast under [kap. 3](forskrift/1997-01-20-79/kap3) Overførings- og reguleringsanlegg. Inntaksanlegg og driftsvassveger skulle førast under [kap. 4](forskrift/2000-12-20-1394/kap4). Inntak/driftsvassveg, jf. grupperinga i [punkt](forskrift/2000-12-20-1394/kap3) 3 foran. Nokre kraftforetak har ikkje rapportert etter desse forutsetningane, slik at overførings- og reguleringsanlegg kan være ført til [kap. 4](forskrift/2000-12-20-1394/kap4) og inntaksanlegg kan være ført til [kap. 3](forskrift/2000-12-20-1394/kap3). I slike høve er det naudsynt med manuell kontroll av kva for anlegg som er reguleringsanlegg og som skal fordelast på dei kraftverk som ligg nedanfor.\n\nTilløpstunnelar som også er senkingstunnelar (for kraftverk som ligg nedanfor og som har nytte av reguleringa) skal handsamast anten som reguleringsanlegg eller vassveg til kraftstasjonen, avhengig av korleis det vart innrapportert ved GAV-berekninga. I nokre døme har selskapa ført på ein passande andel av tilløpstunnelen som reguleringsanlegg.\n\nVed reguleringsanlegg er det oppført bl.a. lukestyringsanlegg og vasstandsmålarar. Reguleringsforeningar som svarer for reine reguleringar, fekk ved innrapportering av tekniske data etter [forskrift av 20. januar 1997 nr. 79](forskrift/1997-01-20-79) ikkje tilgang til [kap. 5](forskrift/1997-01-20-79/kap5) der verdet av slike anleggsdeler er berekna. Dette medførte at slike anleggsdeler vart kommentert i «post 1.8 Kommentarer». For å få berekna GAV for slike anleggsdelar vart det oppretta eit eige driftsmiddel, som vart lagt under post 3.5. Ved berekning av kommunefordelinga skal slike anleggsdeler inkluderast i reguleringsanlegget.\n\n### 5. Retningsliner for kommunefordeling av GAV for driftsmiddel som kryssar kommunegrenser\n\nKommunefordelinga skal baserast på ei berekning av kommunane sin andel av GAV for dei einskilde driftsmiddel basert på deira plassering i høve til kommunegrensene. For berekning av den einskilde kommune sin andel av GAV for driftsmiddel som krysser kommunegrenser, skal følgjande retningsliner leggast til grunn:\n\n*Dammar:*\n\nDammar som har ein kryssande kommunegrense skal fordelast i forhold til damvolum. Luker som ligg i dammen inngår i denne fordelinga. Ved kombinasjonsdammar skal kvar einskild damtype vurderast kvar for seg. Omløps- og flomløpstunnelar skal skiljast ut som eigne einingar og bereknast som vassveg.\n\n*Vassveger:*\n\nFordeling av vassveg skal skje ved at vassvegen med tilslutta driftsmiddel vert fordelt forholdsvis etter lengda.\n\nDer ein vassveg går over frå f.eks. kanal til tunnel eller tunnel til rør, vert desse skilt ut som eigne einingar. Tunnel med greintunnelar vert skilt ut som eigne einingar.\n\nEin vassveg i form av tunnel har forskjellige funksjonar som bl.a. tilløpstunnel, overføringstunnel og avløpstunnel. Kvar av desse skal vurderast som eigne einingar. Tunnelen kan være delt opp i fleire driftsmiddel avhengig av tverrsnitt og drivemåte. Heile tunnelen skal vurderast som ei eining.\n\nTverrslag vert inkludert i tilhøyrande tunnel/sjakt.\n\nBekkeinntak med vassveg, luker og lukesjakter vert inkludert i tilhøyrande tunnel. Svingesystemet vert skilt ut som ei eiga eining. Dersom det er eintydig plassert i ein kommune, skal det tilordnast denne kommunen. Dersom kommunegrensa går gjennom dette området, skal svingesystemet fordelast med 50 pst. på kvar av de to kommunane.\n\nEin vassveg i form av rørgate, består av rør og fundamenter/grøft. Røret kan være delt opp i fleire driftsmiddel avhengig av rørtype og dimensjon, og rørgata kan være både i dagen og nedgravd. Heile rørgata skal vurderast som ei eining.\n\n*Kraftstasjonar: (gjeld ein kraftstasjon)*\n\nKraftstasjon består av bygg/hall, adkomst- og hjelpetunnelar, samt maskin- og elektrotekniske anlegg. Dei einskilde driftsmiddel i kap. 5.1 og 5.3 til 5.9 vert vurdert som eigne einingar, og vert fordelt kvar for seg. For kraftstasjonsbygg/-hall vil fordelinga bli gjort etter sprengningsvolumformelen i NVE sitt kostnadsgrunnlag for store kraftanlegg, jf. NVE publ. nr. 19/1995. Ellers skal kvart driftsmiddel fordelast med 50/50 til kvar kommune, dersom ikkje driftsmidlet er eintydig plassert i ein kommune. Driftsmiddel under pkt. 5.2 vert inkludert i kraftstasjonshallen, utanom adkomsttunnelen som vert vurdert for seg.\n\n### 6. Om grunnlag for avgjerd av den geografiske plasseringa av driftsmiddel\n\nVed kommunegrenser i elver skal det leggjast til grunn at djupålen er kommunegrensa, jf. [vassdragsloven av 15. mars 1940 nr. 3 § 2](lov/1940-03-15-3/§2).\n\nGrunnlag for stadfesting av den geografiske plasseringa av driftsmiddel skal vere basert på tilgjengelege koordinatfesta data for kraftstasjon, vassveg, inntak og dam. Desse dataene vert i hovudsak henta frå kart i målestokk 1:50.000. Kvaliteten er varierande med ein nøyaktigheit på +/– 50 m. Desse dataene er tilgjengelege i geografisk informasjonssystem (GIS) og kan kombinerast med dei nasjonale datasett N250/N50 frå Statens kartverk for å fastslå kommunegrensa. I tillegg kan det nyttast grunnlagsmateriale frå tekniske data som vart sendt inn i samband med fastsetjing av GAV.\n\nDersom det er vanskeleg å konstatera plasseringa av driftsmiddel og kommunane sin andel av eit driftsmiddel på dette grunnlaget, skal kraftverkseigar kontaktast for nærare opplysningar om den nøyaktige plasseringa av driftsmidlet i forhold til kommunegrensene. Ved uklårhet etter dette, skal NVE gjennomføra befaring.\n\n## II\n\nRetningslinene trer i kraft straks, med verknad frå og med eiendomsskatteåret 2001.\n",
 "title": "Retningsliner om grunnlag for og berekning av kommunefordelingsnøklar for grunnlaget for eigedomsskatt for kraftanlegg etter eigedomsskattelova § 8 A-1 første og tredje leden.",
 "type": "forskrift"
}