{
 "canonical_id": "nl-20250620-040#paragraf-9-5",
 "canonical_url": "https://lovspor.no/lov/barnelova/paragraf/9-5/",
 "heading_id": "9-5",
 "language": "no",
 "links": {
  "parent": "https://lovspor.no/lov/barnelova/"
 },
 "provenance": {
  "renderer_version": 8,
  "representation_hash": "fd40fa96336e9d64b9ebe743eccbc9bd83eedf4ad9943eb870474d0b0cd205bd",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "c6633bd68df426b1b77582bce954ae649a5f6c0a0321a41a758f7be400e19af3"
 },
 "ref_id": "lov/2025-06-20-40",
 "schema_version": "1",
 "slug": "barnelova",
 "source": {
  "dataset": "gjeldende-lover",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": null,
  "last_change_in_force": null,
  "note": "Current corpus state; not an applicability-at-date determination.",
  "status": "current"
 },
 "text": "### § 9-5. Korleis bidrag blir fastsett\n\nForeldra kan inngå ein avtale om bidrag.\n\nDersom foreldra ikkje blir einige, kan kvar av dei krevje at Arbeids- og velferdsetaten fastset bidraget. Foreldra kan krevje at Arbeids- og velferdsetaten fastset barnebidraget sjølv om dei har inngått ein avtale om barnebidraget, men dei kan berre få fastsett eit nytt bidragsbeløp dersom reglane i lova vil medføre ei endring på meir enn 12 prosent. Departementet kan gi forskrift om gebyr der Arbeids- og velferdsetaten tek avgjerd om fastsetjing og endring av barnebidrag.\n\nDersom foreldra ikkje lever saman når barnet blir født, og dei ikkje har inngått ein avtale om barnebidrag, skal Arbeids- og velferdsetaten av eige tiltak fastsetje barnebidrag til barnet.\n\nSak om barnebidrag skal likevel avgjerast av domstolane\n\n1. når nokon av foreldra bed om at det blir gjort i samband med ekteskapssak eller rettssak om foreldreansvar, om kven barnet skal bu saman med, eller om samværsrett,\n2. når Arbeids- og velferdsetaten viser partane til domstolane, fordi det er meir tenleg etter den karakteren saka har.\n\nNår det gjeld barnebidrag etter [§ 9-3 andre](lov/2025-06-20-40/§9-3/ledd/2) og [tredje ledd](lov/2025-06-20-40/§9-3/ledd/3) til barn som har fylt 18 år, er det barnet sjølv som inngår ein avtale eller er part i saka.\n\nFår den bidragspliktige barnetillegg frå Forsvaret i samband med avtening av førstegongsteneste, eller har rett til anna yting frå det offentlege der barnetillegg er ein del av stønaden, kan Arbeids- og velferdsetaten av eige tiltak fastsetje barnebidrag til barnet for den tida slikt tillegg blir utbetalt.\n\nForeldra har plikt til å opplyse det organet som skal behandle fastsetjinga av bidrag, om kva arbeid, utdanning, inntekt og formue dei har, og elles om alt anna som kan ha noko å seie for fastsetjinga av bidraget. For å fastsetje bidrag og gebyr kan organet utan omsyn til teieplikta krevje dei opplysningane som trengst frå arbeidsgivarar, Skatteetaten, Arbeids- og velferdsetaten og forsikringsselskap, bankar og andre som forvarar eller forvaltar formueverdiar. For å fastsetje bidrag etter at barnet har fylt 18 år, kan organet utan omsyn til teieplikta krevje opplysningar frå utdanningsinstitusjonar om skulegangen er i gang, held fram eller er avslutta, og om fagleg progresjon.\n",
 "title": "Korleis bidrag blir fastsett",
 "type": "paragraf"
}