{
 "canonical_id": "nl-20130621-075",
 "canonical_url": "https://lovspor.no/lov/fiskesalslagslova/",
 "language": "nn",
 "links": {
  "parent": null
 },
 "provenance": {
  "renderer_version": 8,
  "representation_hash": "b93527a582ece43ec88a22a61bbbfa4db780312cc4d729abf398168c029eaee4",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "56534e2d08a4172b10dd2e24bb6a4fd9cd03db5b3089ef8ba8df4d7a90477f05"
 },
 "ref_id": "lov/2013-06-21-75",
 "schema_version": "1",
 "slug": "fiskesalslagslova",
 "source": {
  "dataset": "gjeldende-lover",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2014-01-01",
  "last_change_in_force": "2015-10-01",
  "note": "Current corpus state; not an applicability-at-date determination.",
  "status": "current"
 },
 "text": "\n# Lov om førstehandsomsetning av viltlevande marine ressursar (fiskesalslagslova)\n\n## Kapittel 1. Innleiande føresegner\n\n### § 1. Formål\n\nFormålet med lova er å medverke til ei berekraftig og samfunnsøkonomisk lønsam forvaltning av viltlevande marine ressursar ved å leggje til rette for gode rammer for førstehandsomsetning og ved å sikre dokumentasjon av ressursuttaket.\n\n### § 2. Sakleg verkeområde\n\nLova gjeld førstehandsomsetning av viltlevande marine ressursar, krav til råstoffkvalitet, stifting og godkjenning av fiskesalslag og kontrollansvaret og vedtaksretten deira. Lova gjeld likevel ikkje førstehandsomsetning av fangst i medhald av havbeiteløyve som er gjeve med heimel i [akvakulturloven](lov/2005-06-17-79) eller forskrift fastsett i medhald av denne. Departementet kan i forskrift fastsetje at slik førstehandsomsetning likevel skal vere omfatta av lova her.\n\nFørstehandsomsetning er omsetning av viltlevande marine ressursar frå den som har hausta dei, og den første omsetninga etter ilandføring dersom fangsten ikkje tidlegare er omsett gjennom eller med godkjenning av eit fiskesalslag. Sal frå eit fiskesalslag er uansett å rekne som førstehandsomsetning.\n\nViltlevande marine ressursar er fisk, sjøpattedyr med heilt eller delvis tilhald i sjøen, andre marine organismar og plantar med tilhald i sjøen eller på eller under havbotnen. Lova gjeld likevel ikkje hausting og anna utnytting av anadrome laksefiskar slik det er definert i [lakse- og innlandsfiskloven § 5](lov/1992-05-15-47/§5) bokstav a.\n\n### § 3. Stadleg verkeområde\n\nLova gjeld på norsk landterritorium unnateke Jan Mayen og Svalbard, i norsk sjøterritorium og indre farvatn, på den norske kontinentalsokkelen og i område oppretta etter [lov 17. desember 1976 nr. 91](lov/1976-12-17-91) om Norges økonomiske sone [§§ 1](lov/1976-12-17-91/§1) og 5.\n\nKongen kan fastsetje at heile eller delar av lova skal gjelde på norsk landterritorium på Jan Mayen, Svalbard, Peter Is øy og Dronning Maud Land.\n\nFor fartøy som fell inn under [deltakerloven](lov/1999-03-26-15), gjeld lova også utanfor områda i første ledd. Departementet kan i forskrift fastsetje at lova skal gjelde for andre fartøy som fell inn under [sjøloven §§ 1](lov/1994-06-24-39/§1) og [4](lov/1994-06-24-39/§4) og lov [12](lov/1994-06-24-39/§12). juni 1987 nr. 48 om norsk internasjonalt skipsregister [§ 1](lov/2013-06-21-75/§1).\n\nLova gjeld ikkje førstehandsomsetning av viltlevande marine ressursar som er hausta med utanlandsk fartøy når fangsten vert ført til utanlandsk hamn.\n\n## Kapittel 2. Stifting og godkjenning av fiskesalslag\n\n### § 4. Godkjenning av fiskesalslag\n\nDepartementet kan godkjenne eit samvirkeforetak, jf. [samvirkelova](lov/2007-06-29-81), som fiskesalslag. Berre fiskarar eller organisasjonar av fiskarar kan vere medlemmer i eit fiskesalslag.\n\nVedtektene til fiskesalslaget skal ha føresegner om følgjande:\n\n1. at fiskesalslaget skal ha ein kontrollkomité,\n2. at verksemd som fiskesalslaget driv, og som ikkje direkte er organisering av førstehandsomsetninga, skal skje gjennom eigne selskap,\n3. at føresegner som vert fastsette om bruk av formuen ved oppløysing av fiskesalslaget skal godkjennast av departementet,\n4. at tvistar mellom fiskesalslaget og medlemmene skal løysast på nærare fastsett måte.\n\nDepartementet kan i forskrift gje nærare føresegner om ansvarsområda til fiskesalslaga, medrekna geografiske område og kva for viltlevande marine ressursar det enkelte fiskesalslaget skal ha einerett til å omsetje.\n\nFiskesalslag har revisjonsplikt.\n\n### § 5. Offentlege kontrollørar\n\nDepartementet skal nemne opp ein offentleg kontrollør i kvart fiskesalslag som skal utføre dei tilsynsoppgåvene som departementet fastset i forskrift. Salslaget betalar honorar til kontrolløren etter satsar fastsette av departementet.\n\nKontrolløren skal ha uhindra tilgang til og innsyn i alle bøker og protokollar og all korrespondanse i salslaget og på førespurnad ha tilgang til andre opplysningar. Kontrolløren har rett til å vere til stades på styremøte og årsmøte i fiskesalslaget.\n\n### § 6. Tilbakekalling av godkjenning\n\nDepartementet kan kalle tilbake godkjenninga permanent eller mellombels dersom\n\n1. fiskesalslaget ikkje oppfyller dei krava som er fastsette i eller etter [samvirkelova](lov/2007-06-29-81),\n2. statens kontrollør har vorte hindra i arbeidet sitt,\n3. fiskesalslaget grovt eller gjenteke har brote føresegner som er fastsette i eller etter lova her, eller\n4. organiseringa og strukturen til fiskesalslaga ikkje er tenleg ut frå formålet med lova.\n\nVed tilbakekalling av godkjenning kan departementet fastsetje at eit anna fiskesalslag skal overta ansvarsområdet til det fiskesalslaget som fekk godkjenninga si kalla tilbake.\n\n### § 7. Overføring av ansvar\n\nFiskesalslag kan føre over ansvar etter lova her eller ansvar etter [havressurslova](lov/2008-06-06-37) til eit felles organ for to eller fleire godkjende fiskesalslag. Fellesorganet skal ha vedtekter som er godkjende av departementet.\n\n[Kapittel 6](lov/2013-06-21-75/kap6) gjeld tilsvarande for eit slikt fellesorgan som er oppretta for å utføre kontroll.\n\n## Kapittel 3. Førstehandsomsetning av viltlevande marine ressursar\n\n### § 8. Førstehandsomsetning\n\nFørstehandsomsetning av viltlevande marine ressursar skal skje gjennom eller med godkjenning av eit fiskesalslag.\n\nDet er forbode å utføre eller tilverke viltlevande marine ressursar som ikkje er omsette i første hand med godkjenning av eit fiskesalslag, med mindre det er til eige forbruk.\n\nDepartementet kan i forskrift gje nærare føresegner om unntak frå føresegnene i første og andre ledd, under dette unntak for delar, produkt eller biprodukt av viltlevande marine ressursar og for sjølvtilverking av eigen fangst.\n\n### § 9. Fastsetjing av avgift\n\nEit fiskesalslag kan fastsetje avgift for førstehandsomsetning av viltlevande marine ressursar. Avgifta skal fastsetjast på årsmøtet til fiskesalslaget. [Kapittel VII i forvaltningsloven](lov/1967-02-10/kapvii) gjeld ikkje for fastsetjing av avgifta.\n\nAvgifta skal brukast til verksemd som anten direkte knyter seg til førstehandsomsetning av viltlevande marine ressursar, eller som står i rimeleg nær samanheng med fremme av dette formålet.\n\n### § 10. Fastsetjing av salsvilkår og omsetningsformer\n\nEit fiskesalslag skal fastsetje allmenne salsvilkår for førstehandsomsetning av viltlevande marine ressursar, og kan avgjere kva omsetningsformer som kan nyttast.\n\nEndringar i salsvilkår eller omsetningsformer skal leggjast fram for partane før endeleg avgjerd vert teken.\n\nKjøpar og seljar er bundne av dei fastsette salsvilkåra og omsetningsformene.\n\n[Kapittel VII i forvaltningsloven](lov/1967-02-10/kapvii) gjeld ikkje ved fastsetjing av salsvilkår og omsetningsformer.\n\n### § 11. Fastsetjing av minstepris\n\nDet kan fastsetjast minstepris for førstehandsomsetning av viltlevande marine ressursar. Formålet med minstepris er å få til ei rimeleg fordeling mellom fiskar og industri av inntekt frå marknaden.\n\nMinstepris vert bestemt etter forhandlingar mellom fiskesalslaget og dei andre partane, og fiskesalslaget skal fastsetje den minsteprisen det er oppnådd semje om. Ved usemje om minsteprisen skal den fastsetjast etter dei prosedyrar som framgår av [§ 12](lov/2013-06-21-75/§12). [Kapittel VII i forvaltningsloven](lov/1967-02-10/kapvii) gjeld ikkje ved fastsetjing av minstepris.\n\nDet er forbode å omsetje til lågare pris enn den fastsette minsteprisen.\n\n### § 12. Framgangsmåte ved usemje\n\nDersom partane gjennom forhandlingar ikkje vert samde om minstepris, skal spørsmålet om minstepris leggjast fram for mekling. Departementet kan i forskrift gje nærare føresegner om samansetjing av meklingsnemnda og korleis meklinga skal gjennomførast.\n\nDersom mekling ikkje fører fram, kan fiskesalslaget fastsetje minstepris.\n\n## Kapittel 4. Regulering av hausting og dirigering av fangstar\n\n### § 13. Rett til å regulere hausting\n\nNår det er nødvendig av omsyn til avtaket kan fiskesalslag fastsetje mellombels forbod mot hausting eller gjennomføre andre reguleringar. Det same gjeld dersom reguleringar er nødvendige for å kunne utnytte fangstane på ein tenleg måte.\n\nReguleringane kan avgrensast til enkelte viltlevande marine ressursar, fartøygrupper og distrikt.\n\nDepartementet kan i forskrift gje nærare føresegner om fiskesalslaga sin reguleringsrett etter første og andre ledd.\n\n[Kapittel VII i forvaltningsloven](lov/1967-02-10/kapvii) gjeld ikkje ved avgjerder etter første ledd.\n\n### § 14. Rett til å dirigere fangstar\n\nNår det er nødvendig for å få fangstar omsette på den mest tenlege måten, kan fiskesalslag dirigere fangstane til bestemte kjøparar og til bestemt bruk.\n\n[Kapittel V](lov/1967-02-10/kapv) og [VII i forvaltningsloven](lov/1967-02-10/kapvii) gjeld ikkje ved avgjerder etter første ledd.\n\n### § 15. Orientering\n\nPartane skal orienterast før det vert sett i verk regulering eller dirigering etter [§§ 13](lov/2013-06-21-75/§13) og [14](lov/2013-06-21-75/§14).\n\n## Kapittel 5. Kvalitetskrav\n\n### § 16. Kvalitetskrav til hausting og handtering av råstoff\n\nDepartementet kan påleggje fiskesalslaga oppgåver for å fremme og ha tilsyn med kvalitet ved hausting og handtering av råstoff, og sjå til at dette skjer i samsvar med forskrifter om kvalitet fastsette etter [matlova § 9](lov/2003-12-19-124/§9).\n\n## Kapittel 6. Kontrollansvaret til fiskesalslaga\n\n### § 17. Kontrolloppgåver\n\nFiskesalslaga skal kontrollere at føresegner som er fastsette i eller etter lova her vert haldne.\n\nDepartementet kan påleggje fiskesalslag å kontrollere opplysningar om fangstar sjølv om fangsten ikkje fell inn under fiskesalslaga sin omsetningsrett.\n\nDepartementet kan i forskrift gje nærare føresegner om korleis fiskesalslaga skal organisere og gjennomføre kontrollarbeidet og om rapporteringsrutinar.\n\n### § 18. Tilgang og bistandsplikt\n\nVed kontroll etter [§ 17](lov/2013-06-21-75/§17) kan fiskesalslaga krevje uhindra tilgang til haustings- eller transportfartøy og til kontora, lagera og produksjonsanlegga til kjøparen eller mottakaren. I denne samanhengen kan salslaga krevje uhindra tilgang til fangstdagbok, landingsjournal, setlar og rekneskapar. Det same gjeld når fangst vert overført frå eller til steng eller merd.\n\nDei som vert kontrollerte i samsvar med føresegner gjevne i eller i medhald av lova, har plikt til å samarbeide ved kontrollen.\n\nPolitiet skal yte salslaget nødvendig hjelp og vern ved gjennomføring av kontroll.\n\n### § 19. Utveksling av informasjon\n\nFiskesalslag skal gje og ta imot dei opplysningane som Fiskeridirektoratet meiner er nødvendige for å gjennomføre kontroll etter lova her og [havressurslova](lov/2008-06-06-37).\n\n### § 20. Utveksling av opplysningar mellom kontrollstyresmakter\n\nEit fiskesalslag kan utan hinder av teieplikta gje andre kontrollstyresmakter, politi eller påtalemakt opplysningar som har naturleg samanheng med oppgåvene deira etter lova her.\n\nTeieplikta for personell i andre kontrollstyresmakter, politi eller påtalemakt hindrar ikkje at dei gjev fiskesalslaga opplysningar etter første ledd.\n\nKongen kan i forskrift gje nærare føresegner om utveksling av opplysningar.\n\n### § 21. Fangst som er omsett i strid med lova\n\nFangst eller verdien av fangst tilfell vedkomande salslag når fangsten er hausta eller omsett i første hand i strid med føresegner som er fastsette i eller etter lova her.\n\nDepartementet kan i forskrift fastsetje reglar om handsaming av slike saker, korleis verdien av fangsten skal fastsetjast, om det kan gjevast vederlag for kostnader ved ilandføring og om kva fiskesalslaga kan bruke slike midlar til.\n\nEndeleg vedtak er tvangsgrunnlag for utlegg, og verdien av fangsten kan krevjast inn ved motrekning i fangstoppgjer.\n\nDepartementet kan fastsetje forskrift om mellombels tilbakehald av fangstverdi.\n\n## Kapittel 7. Reaksjonar ved lovbrot\n\n### § 22. Straffansvar\n\nDen som med vilje eller aktlaust bryt føresegner eller let vere å etterkome pålegg fastsette i eller etter [§§ 5](lov/2013-06-21-75/§5) andre ledd, 8, 10 tredje ledd, 11 tredje ledd, 13, 14 og 18, vert straffa med bøter eller fengsel i inntil eitt år.\n\nGrovt brot på føresegnene etter første ledd, som er gjort med grov aktløyse eller med vilje, kan straffast med fengsel i inntil seks år. Ved vurderinga av om brotet er grovt, skal det særleg leggjast vekt på om den økonomiske eller potensielle økonomiske verdien av brotet er stor, om brotet har skjedd systematisk og over tid, om brotet er grenseoverskridande og om brotet har skjedd som ledd i organisert verksemd.\n\nNår straffansvar etter første ledd kan gjerast gjeldande mot fartøyføraren for ei handling nokon av mannskapet på eit fartøy står for, kan den underordna berre straffast dersom han har brote føresegner med vilje. Ved avgjerda av om ein underordna skal straffast, skal det særleg takast omsyn til den preventive verknaden av straffa, kor grovt brotet er og om vedkommande har hatt eller kunne ha oppnådd fordel ved brotet.\n\nFartøyføraren kan vedta førelegg på vegner av oppdragsgjevaren. Oppdragsgjevaren kan også straffast i sak som vert reist mot fartøyføraren.\n\n> Endra med [lov 19 juni 2015 nr. 65](lov/2015-06-19-65) (ikr. 1 okt 2015).\n\n### § 23. Inndraging\n\nVed brot på føresegner etter [§ 22](lov/2013-06-21-75/§22) første ledd kan fangsten inndragast. Det same gjeld reiskapar, gjenstandar, eigedomar, anlegg eller fartøy som er brukte ved lovbrotet. Dette gjeld utan omsyn til kven som er eigar. I staden for tingen kan verdien heilt eller delvis inndragast hos den skuldige eller den det er handla på vegner av, eller hos eigaren.\n\nDet kan fastsetjast at panterett og andre rettar i ting som vert inndregne, heilt eller delvis fell bort. Føresegnene i [straffeloven § 74](lov/2005-05-20-28/§74) gjeld tilsvarande.\n\nNår lovleg og ulovleg fangst er blanda saman, kan heile fangsten inndragast.\n\n> Endra med [lov 19 juni 2015 nr. 65](lov/2015-06-19-65) (ikr. 1 okt 2015).\n\n## Kapittel 8. Iverksetjing, overgangsregel og endringar i andre lover\n\n### § 24. Iverksetjing\n\nLova gjeld frå den tid Kongen fastset.[^1] Frå same tid vert [lov 14. desember 1951 nr. 3](lov/1951-12-14-3) om omsetning av råfisk oppheva.\n\nForskrifter og enkeltvedtak som er fastsette i eller i medhald av [lov 14. desember 1951 nr. 3](lov/1951-12-14-3) om omsetning av råfisk, gjeld framleis inntil dei vert oppheva.\n\n1 Frå 1 jan 2014 iflg. [res. 21 juni 2013 nr. 726](forskrift/2013-06-21-726).\n\n### § 25. Overgangsregel\n\nFiskesalslag som har godkjende vedtekter etter [lov 14. desember 1951 nr. 3](lov/1951-12-14-3) om omsetning av råfisk, kan utan ny godkjenning halde fram med verksemda i inntil to år etter at lova her vert sett i verk.\n\n### § 26. Endringar i andre lover\n\nFrå den tid lova vert sett i verk, vert det gjort følgjande endringar i andre lover: – – –\n",
 "title": "Lov om førstehandsomsetning av viltlevande marine ressursar (fiskesalslagslova)",
 "type": "lov"
}