{
 "canonical_id": "nl-20140606-019",
 "canonical_url": "https://lovspor.no/lov/lov-om-stans-i-utbetalinger-etter-barnebortføring/",
 "language": "nn",
 "links": {
  "parent": null
 },
 "provenance": {
  "renderer_version": 8,
  "representation_hash": "110e9b0722bc6d99918a1f853c065044f263ac32372282f067d5673f8d292293",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "4e4ebcd0758a534a4f7cdb49917ef0954af8c1a22614a783e5ef896f8c5e91b5"
 },
 "ref_id": "lov/2014-06-06-19",
 "schema_version": "1",
 "slug": "lov-om-stans-i-utbetalinger-etter-barnebortføring",
 "source": {
  "dataset": "gjeldende-lover",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2015-01-01",
  "last_change_in_force": "2026-01-01",
  "note": "Current corpus state; not an applicability-at-date determination.",
  "status": "current"
 },
 "text": "\n# Lov om stans i utbetalinga av offentlege ytingar og barnebidrag når ein av foreldra har bortført eit barn til utlandet\n\n## § 1. Formål\n\nFormålet med lova er å fremje rask tilbakeføring av barn som er bortførte til utlandet og å førebyggje slik bortføring.\n\n## § 2. Kva lova gjeld\n\nLova gjeld for saker om bortføring av barn til utlandet.\n\nEit barn skal reknast for bortført dersom det til vanleg er busett i Noreg, men er teke med til, eller vert halde tilbake i, eit anna land i strid med reglane i barnelova om foreldreansvaret. Det er også eit vilkår at\n\n1. Barne-, ungdoms- og familiedirektoratet handsamar saka som ei bortføringssak etter reglane i [Haag-konvensjonen](lov/1988-07-08-72/bbk) frå 1980 om dei sivile sidene ved internasjonal barnebortføring eller [Europarådskonvensjonen](lov/1988-07-08-72/fak) frå 1980 om godkjenning og fullbyrding av avgjerder om foreldreansvar og om gjenoppretting av foreldreansvar (heretter kalla «konvensjonane»),\n2. politiet har registrert eit barn som sakna, eller\n3. det er oppretta straffesak om barnebortføring.\n\nSom barn skal reknast personar som ikkje har fylt 16 år.\n\n> Endra ved lov [16 juni 2023 nr. 41](lov/2023-06-16-41) (i kraft 16 juni 2023 iflg. [res. 16 juni 2023 nr. 928](forskrift/2023-06-16-928)).\n\n## § 3. Definisjonar\n\nOffentlege ytingar tyder i lova her\n\n1. ytingar etter [folketrygdloven](lov/1997-02-28-19), [barnetrygdloven](lov/2002-03-08-4), [kontantstøtteloven](lov/1998-06-26-41), [forskotteringsloven](lov/1989-02-17-2) og andre lover som vert administrerte av arbeids- og velferdsetaten,\n2. stønad etter [lov 18. desember 2009 nr. 131](lov/2009-12-18-131) om sosiale tjenester i arbeids- og velferdsforvaltningen, og\n3. bustøtte etter [bustøttelova](lov/2012-08-24-64).\n\nBarnebidrag tyder i lova her barnebidrag som vert kravd inn av Innkrevjingsmyndigheita, med unntak av oppfostringsbidrag fastsett etter [barnevernsloven § 15-12](lov/2021-06-18-97/§15-12).\n\n> Endra ved lover [19 des 2017 nr. 122](lov/2017-12-19-122) (ikr. 1 apr 2018 iflg. [res. 16 feb 2018 nr. 220](forskrift/2018-02-16-220)), [18 juni 2021 nr. 97](lov/2021-06-18-97) (i kraft 1 jan 2023 iflg. [res. 14 okt 2022 nr. 1739](forskrift/2022-10-14-1739)), [16 juni 2023 nr. 41](lov/2023-06-16-41) (i kraft 16 juni 2023 iflg. [res. 16 juni 2023 nr. 928](forskrift/2023-06-16-928)), [25 april 2025 nr. 12](lov/2025-04-25-12) (i kraft 1 jan 2026 iflg. [res. 10 juni 2025 nr. 967](forskrift/2025-06-10-967)).\n\n## § 4. Melding om barnebortføringar til utlandet\n\nDersom Barne-, ungdoms- og familiedirektoratet handsamar ei sak som ei bortføringssak etter konvensjonane, skal det sende melding om dette til arbeids- og velferdsforvaltninga og Husbanken. I andre bortføringssaker skal det lokale politidistriktet sende melding når det har registrert eit barn som sakna eller det er oppretta straffesak om barnebortføring.\n\nMelding til Husbanken og den kommunale delen av arbeids- og velferdsforvaltninga skal ikkje gje opplysningar om anna enn at eit barn er bortført, personane saka gjeld og endringa i opphaldsstad.\n\nMeldingar etter paragrafen her kan sendast utan hinder av teieplikt.\n\n> Endra ved lov [16 juni 2023 nr. 41](lov/2023-06-16-41) (i kraft 16 juni 2023 iflg. [res. 16 juni 2023 nr. 928](forskrift/2023-06-16-928)).\n\n## § 5. Stans i ytingar som ikkje skal utbetalast i utlandet\n\nNår eit barn er bortført, skal arbeids- og velferdsforvaltninga og Husbanken stanse ytingar som det ikkje er grunnlag for å utbetale i utlandet. Handsaming og klage følgjer dei vanlege reglane for dei einskilde ytingane.\n\n## § 6. Innkrevjing av barnebidrag\n\nBarnebidrag skal krevjast inn etter dei vanlege reglane så lenge barnet er bortført, anten det er bortføraren eller den attverande av foreldra som er bidragspliktig. Det kan ikkje krevjast endring av bidraget etter [barnelova § 74](lov/1981-04-08-7/§74) første leddet så lenge bortføringa varar.\n\n> **Endres** ved lov [20 juni 2025 nr. 40](lov/2025-06-20-40) (i kraft fra den tid Kongen bestemmer).\n\n## § 7. Avgjerd om å halde tilbake ytingar og barnebidrag til bortføraren\n\nNår eit barn er bortført til utlandet, skal Arbeids- og velferdsdirektoratet eller eit særskilt utpeika organ i arbeids- og velferdsetaten halde tilbake offentlege ytingar og barnebidrag som vert utbetalte til bortføraren sjølv eller til bortføraren på vegne av barnet. Dette gjeld ikkje dersom tiltaket må reknast som eit uforholdsmessig inngrep ut frå den konkrete situasjonen. Ved vurderinga skal ein mellom anna leggje vekt på kva dette har å seie for at barnet kan bli ført tilbake, og på risikoen for at barnet og bortføraren vert påført skade.\n\n## § 8. Innhenting av opplysningar i saker om å halde tilbake ytingar og barnebidrag\n\nVed handsaminga av saker etter [§ 7](lov/2014-06-06-19/§7) kan organet som skal treffe avgjerda, krevje opplysningar frå instansar og personar som er nemnde i [folketrygdloven § 21-4](lov/1997-02-28-19/§21-4) første leddet. Det er eit vilkår at opplysningane er naudsynte for avgjerda.\n\nEin kan til vanleg berre hente inn opplysningar om\n\n1. namn, adresse, fødselsdato, slektskap og sivilstatus,\n2. staden der barnet og bortføraren oppheld seg og tilhøva som dei lever under,\n3. den fysiske og psykiske helsa til barnet og bortføraren og særlege behov og utgifter knytte til helsetilstanden deira,\n4. bortføraren si inntekt og økonomi medan bortføringa varar, og\n5. tilhøva mellom foreldra og barnet.\n\nEin kan berre hente inn opplysningane som er nemnde i andre leddet bokstavane b, c og e dersom ein ikkje kan skaffe opplysningane på anna vis.\n\nOrgan som tek del i handsaminga av ei barnebortføringssak, skal gje opplysningar etter paragrafen her av eige tiltak.\n\nDei som skal gje opplysningar etter paragrafen her, skal gjere dette utan hinder av teieplikt og utan godtgjersle.\n\n> Endra ved [lov 20 des 2018 nr. 98](lov/2018-12-20-98) (ikr. 1 jan 2019).\n\n## § 9. Sakkunnig vurdering\n\nDersom opplysningane i saka gjev grunn til det, kan organet som skal treffe avgjerda etter [§ 7](lov/2014-06-06-19/§7), be om at ein sakkunnig vurderer om det er forsvarleg å halde tilbake ytingar og barnebidrag. Den sakkunnige skal ha tilgang til dokumenta i saka og kan hente inn opplysningar etter [§ 8](lov/2014-06-06-19/§8). Sakkunnige har krav på godtgjersle for arbeidet sitt og skal få dekt utlegg i samband med saka.\n\n## § 10. Ny vurdering\n\nDersom nye opplysningar eller endringar i den einskilde saka talar for det, skal ein vurdere å gjere nytt vedtak etter [§ 7](lov/2014-06-06-19/§7). Saka skal i alle tilfelle vurderast på nytt når det har gått to år etter bortføringa og barnet framleis ikkje er ført tilbake. Ny vurdering kan skje utan hinder av avgrensingane i [forvaltningsloven § 35](lov/1967-02-10/§35).\n\n## § 11. Sperra konto\n\nPengar som vert haldne tilbake, skal stå på sperra renteberande konto.\n\nOffentlege ytingar på sperra konto skal utbetalast til den som har rett til pengane eller rett til å ta imot pengane på vegner av barnet, når\n\n1. barnet er ført tilbake,\n2. det er avgjort rettsleg eller avtalt mellom partane at barnet ikkje skal tilbake,\n3. vedtak er gjort om etter [§ 10](lov/2014-06-06-19/§10), eller\n4. det bortførte barnet har fylt 16 år.\n\nBarnebidrag for tidsrom etter at vilkåra i andre leddet bokstavane a til c er oppfylte, vert utbetalt etter dei vanlege reglane om dette. I andre tilfelle skal bidraget setjast på sperra konto, også etter at barnet har fylt 16 år. Barnebidrag på sperra konto skal utbetalast til barnet når barnet fyller 18 år.\n\n## § 12. Ytingar og barnebidrag til den attverande av foreldra\n\nYtingar som den attverande av foreldra får utbetalt som representant for eit bortført barn eller på grunn av omsorga for barnet, vert utbetalte i opp til seks månader etter at barnet vart bortført, men i opp til tolv månader dersom den attverande av foreldra framleis har utgifter til omsorga for barnet eller dersom andre særlege grunnar gjer det rimeleg.\n\nDersom barnebidrag framleis vert kravd inn frå bortføraren etter at utbetaling er stansa etter første leddet, skal bidraget setjast på sperra renteberande konto. Reglane i [§ 11](lov/2014-06-06-19/§11) tredje ledd gjeld tilsvarande.\n\nUtbetalinga av ytingar etter første leddet og innkrevjing av barnebidrag frå bortføraren skal stansast så snart det er avgjort rettsleg eller avtalt mellom partane at barnet ikkje skal tilbake.\n\nHandsaming og klage ved avgjerder om ytingar til den attverande av foreldra etter paragrafen her, følgjer dei vanlege reglane for dei einskilde ytingane.\n\n## § 13. Saker der barnevernet har omsorga for barnet\n\nLova gjeld også for saker der ein av foreldra eller begge bortfører til utlandet barn som barnevernet har teke over omsorga for. Barnevernet skal varslast og få høve til å uttale seg etter reglane i [forvaltningsloven § 16](lov/1967-02-10/§16). Reglane i § 12 i lova her gjeld tilsvarande.\n\nDersom foreldra er saman om bortføringa, kan tiltak etter lova nyttast mot begge.\n\n## § 14. Handsaming av saker om å halde tilbake ytingar og barnebidrag\n\nVed handsaminga av saker etter [§§ 7](lov/2014-06-06-19/§7) til [11](lov/2014-06-06-19/§11) gjeld reglane i forvaltningsloven, med desse særreglane og presiseringane:\n\n1. både bortføraren og den attverande av foreldra skal reknast som part i saka ved avgjerder etter [§ 7](lov/2014-06-06-19/§7),\n2. avgjerd om ikkje å halde tilbake ytingar og barnebidrag skal reknast for enkeltvedtak,\n3. arbeids- og velferdsetaten og sakkunnige etter [§ 9](lov/2014-06-06-19/§9) har teieplikt etter reglane i [arbeids- og velferdsforvaltningsloven § 7](lov/2006-06-16-20/§7), og\n4. avgjerder etter § 7 kan ikkje påklagast, men kan ankast inn for Trygderetten etter reglane i [lov 16. desember 1966 nr. 9](lov/1966-12-16-9) om anke til Trygderetten.\n\n## § 15. Forskrifter\n\nDepartementet kan gje forskrifter til utfylling og gjennomføring av lova, mellom anna til\n\n1. [§ 4](lov/2014-06-06-19/§4) om meldingar når barn er bortført,\n2. [§ 7](lov/2014-06-06-19/§7) om å halde tilbake ytingar og barnebidrag,\n3. [§ 9](lov/2014-06-06-19/§9) om oppnemning av og betaling til sakkunnige,\n4. [§ 11](lov/2014-06-06-19/§11) om sperra konto, og\n5. [§ 12](lov/2014-06-06-19/§12) om ytingar og bidrag til den attverande av foreldra.\n\n## § 16. Ikraftsetjing og overgangsreglar\n\nLova gjeld frå den tid Kongen fastset.[^1]\n\nLova gjeld også der barnet vart bortført før lova tok til å gjelde.\n\nYtingar eller barnebidrag for tidsrom før lova tok til å gjelde, kan ikkje haldast tilbake med heimel i lova.\n\n1 Frå 1 jan 2015 iflg. [res. 19 des 2014 nr. 1784](forskrift/2014-12-19-1784).\n",
 "title": "Lov om stans i utbetalinga av offentlege ytingar og barnebidrag når ein av foreldra har bortført eit barn til utlandet",
 "type": "lov"
}