{
 "canonical_id": "nl-20060519-016#paragraf-2",
 "canonical_url": "https://lovspor.no/lov/offentleglova-offl/paragraf/2/",
 "heading_id": "2",
 "language": "nn",
 "links": {
  "parent": "https://lovspor.no/lov/offentleglova-offl/"
 },
 "provenance": {
  "renderer_version": 8,
  "representation_hash": "4d847aa3f90ef23936ea8a4dde28677048d75726e606ed53f314885cf9f2004d",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "c80284df355161a93b7f8c1eac34771e7df0ce92888d6a570e6891d76764665f"
 },
 "ref_id": "lov/2006-05-19-16",
 "schema_version": "1",
 "slug": "offentleglova-offl",
 "source": {
  "dataset": "gjeldende-lover",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2009-01-01",
  "last_change_in_force": "2026-07-01",
  "note": "Current corpus state; not an applicability-at-date determination.",
  "status": "current"
 },
 "text": "### § 2. Verkeområdet til lova\n\nLova gjeld for\n\n1. staten, fylkeskommunane og kommunane,\n2. andre rettssubjekt i saker der dei gjer enkeltvedtak eller utferdar forskrift,\n3. sjølvstendige rettssubjekt der stat, fylkeskommune eller kommune direkte eller indirekte har ein eigardel som gir meir enn halvparten av røystene i det øvste organet i rettssubjektet, og\n4. sjølvstendige rettssubjekt der stat, fylkeskommune eller kommune direkte eller indirekte har rett til å velje meir enn halvparten av medlemmene med røysterett i det øvste organet i rettssubjektet.\n\nBokstavane c og d gjeld ikkje rettssubjekt som hovudsakleg driv næring i direkte konkurranse med og på same vilkår som private. For verksemder som etter offentleg oppkjøp eller liknande kjem inn under bokstavane c eller d, gjeld lova frå og med fjerde månadsskiftet etter den månaden da vilkåra vart oppfylte.\n\nKongen kan gi forskrift om at lova ikkje skal gjelde for sjølvstendige rettssubjekt eller for visse dokument hos sjølvstendige rettssubjekt som er omfatta av første ledd bokstavane c eller d, dersom det må reknast som nødvendig ut frå omsynet til arten av verksemda, konkurransesituasjonen eller andre særlege tilhøve. Det same gjeld dersom det gjeld unntak frå innsynsretten for det alt vesentlege av dokumenta til verksemda og særlege tungtvegande omsyn tilseier det. Kongen kan gi forskrift om at lova heilt eller delvis skal gjelde for sjølvstendige rettssubjekt som er knytte til stat eller kommune utan å oppfylle vilkåra i første ledd bokstav c eller d, eller som er unnatekne etter første ledd andre punktum.\n\nLova gjeld ikkje for Stortinget, Riksrevisjonen, Sivilombodet og andre organ for Stortinget.\n\nLova gjeld ikkje for gjeremål som domstolane har etter rettsstellovene. Lova gjeld heller ikkje for gjeremål som andre organ har etter rettsstellovene i eigenskap av rettsstellorgan. Lova gjeld dessutan ikkje for gjeremål som politiet og påtalemakta har etter straffeprosessloven. Lova gjeld ikkje for dokument som blir behandla av Etterretningstenesta etter [etterretningstjenesteloven](lov/2020-06-19-77), eller for straffesaksdokument som blir lånte ut frå politiet til Statens kommisjon for partnardrap eller til Statens helsetilsyn etter [barnevoldsundersøkelsesloven § 9](lov/2026-05-29-20/§9). Kongen kan gi forskrifter om kva lover som skal reknast som rettsstellover, og om at enkelte gjeremål etter rettsstellovene likevel skal vere omfatta av lova.\n\nLova gjeld ikkje ved innsyn i Folkeregisteret i opplysningar som i medhald av [folkeregisterloven § 3-1](lov/2016-12-09-88/§3-1) er registrerte om enkeltpersonar.\n\nLova gjeld for Svalbard dersom ikkje anna blir fastsett av Kongen.\n\nFøresegnene i [§ 6](lov/2006-05-19-16/§6), [§ 7](lov/2006-05-19-16/§7) andre ledd, [§ 8](lov/2006-05-19-16/§8) tredje ledd andre punktum og fjerde og femte ledd og [§ 30](lov/2006-05-19-16/§30) første ledd tredje punktum og andre ledd gjeld uavhengig av føresegnene i paragrafen her for alle verksemder som er omfatta av EØS-avtalen vedlegg XI nr. 5k (direktiv [2003/98/EF](eu/32003l0098) som endra ved direktiv [2013/37/EU](eu/32013l0037)) om vidarebruk av informasjon frå offentleg sektor.\n\n> Endra ved lover [28 apr 2017 nr. 22](lov/2017-04-28-22) (ikr. 28 apr 2017 iflg. [res. 28 apr 2017 nr. 502](forskrift/2017-04-28-502)), [9 des 2016 nr. 88](lov/2016-12-09-88) (ikr. 1 okt 2017 iflg. [res. 9 juni 2017 nr. 718](forskrift/2017-06-09-718)), [19 juni 2020 nr. 77](lov/2020-06-19-77) (ikr. 1 jan 2021 iflg. res. [1 nov 2020 nr. 2296](forskrift/2020-11-10-2296)), [20 des 2022 nr. 115](lov/2022-12-20-115), [28 mars 2025 nr. 5](lov/2025-03-28-5) (i kraft 1 april 2025 iflg. [res. 28 mars 2025 nr. 544](forskrift/2025-03-28-544)), [29 mai 2026 nr. 20](lov/2026-05-29-20) (i kraft 1 juli 2026 iflg. [res. 29 mai 2026 nr. 920](forskrift/2026-05-29-920)). **Vert endra** ved lov [19 juni 2026 nr. 36](lov/2026-06-19-36) (i kraft frå den tid Kongen bestemmer).\n",
 "title": "Verkeområdet til lova",
 "type": "paragraf"
}