{
 "canonical_id": "nl-19900518-011",
 "canonical_url": "https://lovspor.no/lov/stadnamnlova-stadnl/",
 "language": "nn",
 "links": {
  "parent": null
 },
 "provenance": {
  "renderer_version": 8,
  "representation_hash": "45122cb3794bd6ec6601c3abe76ec4166e770802bacfa666209b59ea2ccda7af",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "3609e97d565cf64c9438b665f8af72236c639b130669fb0cb68d8760ce92ce4c"
 },
 "ref_id": "lov/1990-05-18-11",
 "schema_version": "1",
 "slug": "stadnamnlova-stadnl",
 "source": {
  "dataset": "gjeldende-lover",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "1991-07-01",
  "last_change_in_force": "2021-06-01",
  "note": "Current corpus state; not an applicability-at-date determination.",
  "status": "current"
 },
 "text": "\n# Lov om stadnamn (stadnamnlova)\n\n## § 1. Formål og verkeområde\n\nFormålet med denne lova er å ta vare på stadnamn som språklege kulturminne, gi dei ei skriftform som er praktisk, og som ikkje skyggjer for meiningsinnhaldet i namnet, og medverke til kjennskap til og aktiv bruk av namna.\n\nLova skal sikre omsynet til norske, samiske og kvenske stadnamn i samsvar med nasjonalt lovverk og internasjonale avtalar og konvensjonar.\n\nLova gjeld når organ for stat, fylkeskommune og kommune skal fastsetje stadnamn eller skrivemåten av dei, eller bruke dei i tenesta. Lova gjeld også bruk av stadnamn i selskap som det offentlege eig fullt ut og i læremiddel som skal brukast i skolen. Departementet kan i særskilte tilfelle gi forskrift om at lova skal gjelde når selskap som det offentlege ikkje eig fullt ut, skal bruke stadnamn.\n\nLova gjeld ikkje for Svalbard, Jan Mayen og dei norske bilanda, den norske kontinentalsokkelen og Noregs økonomiske sone.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019).\n\n## § 2. Definisjonar\n\nI denne lova tyder:\n\n1. stadnamn: namn på terrengformasjonar som fjell og vatn, kulturformasjonar som gardsområde, gardsbruk, vegar og bruer, administrative område som kommunar og sokn, reinbeitedistrikt, institusjonar og adresser\n2. gardsnamn: namnet på heile det gardsområdet som eitt eller fleire gardsnummer er knytte til\n3. bruksnamn: namn på gardsbruk eller annan eigedom med eitt eller fleire bruksnummer eller festenummer under eit gardsnummer\n4. nedervd stadnamn: stadnamn som munnleg eller skriftleg er overlevert frå tidlegare generasjonar\n5. nedervd lokal uttale: uttale som er overlevert frå tidlegare generasjonar, som har vore vanleg på staden, og som framleis er i levande bruk\n6. rettskrivingsprinsipp: allmenne reglar for korleis lydar og lydkombinasjonar skal givast att i skrift\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019).\n\n## § 3. Namnevern\n\nEit stadnamn kan berre takast i bruk på ein stad der det tradisjonelt ikkje høyrer heime dersom det ikkje er i bruk som verna etternamn, ikkje er eit særeige namn og heller ikkje må vernast av andre grunnar.\n\nEit nedervd stadnamn kan berre bytast ut med eit anna namn som er på same språk, og som har tradisjon som namn på det same namneobjektet. Unntak kan gjerast dersom særlege grunnar talar for det.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019).\n\n## § 4. Reglar om skrivemåten\n\nDersom ikkje anna er fastsett i denne lova, skal det ved fastsetjing av skrivemåten av stadnamn takast utgangspunkt i den nedervde lokale uttalen. Skrivemåten skal følgje gjeldande rettskrivingsprinsipp for norsk, samisk og kvensk. Skogfinske stadnamn på Austlandet følgjer norske rettskrivingsprinsipp.\n\nHar skrivemåten vore lenge i bruk, og er vel kjend og innarbeidd, kan ein fråvike gjeldande rettskriving og rettskrivingsprinsipp.\n\nNår det same namnet er brukt om ulike namneobjekt på den same staden, skal den skrivemåten som er brukt for det namneobjektet namnet opphavleg vart brukt om, som hovudregel vere retningsgivande for skrivemåten for dei andre namneobjekta. Dette gjeld ikkje i dei tilfella der det opphavlege namnet på namneobjektet er eit bruksnamn med ein skrivemåte som er fastsett av grunneigaren.\n\nTo eller fleire skriftformer av same namn på det same namneobjektet kan fastsetjast som sidestilte, dersom eitt eller fleire av desse vilkåra er oppfylte:\n\n1. det finst fleire uttalevariantar av namnet fordi lokaliteten har stor geografisk utbreiing, eller ligg i eit dialektalt eller administrativt grenseområde\n2. to eller fleire skriftformer av namnet er vel innarbeidde\n3. det er sterk lokal interesse for to eller fleire av formene\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019).\n\n## § 5. Særskilde reglar om gardsnamn og bruksnamn\n\nSkrivemåten av gardsnamn og bruksnamn som språkleg og geografisk fell saman med nedervde stadnamn, eller med andre stadnamn som etter reglane i denne lova eller i andre lover og forskrifter skal brukast av det offentlege, skal fastsetjast etter reglane i [§§ 4](lov/1990-05-18-11/§4) til 8.\n\nVedtak om skrivemåten av gardsnamn skal som hovudregel vere retningsgivande for skrivemåten av bruksnamn som er identisk med gardsnamnet. Det same gjeld der gardsnamnet går inn som ein del av bruksnamnet.\n\nI saker om skrivemåten av nedervde bruksnamn har eigaren rett til å fastsetje skrivemåten dersom han kan dokumentere at den ønskte skrivemåten har vore i offentleg bruk som bruksnamn.\n\nEigaren eller festaren kan, med dei avgrensingane som følgjer av [§ 3](lov/1990-05-18-11/§3), sjølv velje namn og fastsetje skrivemåten av namnet på eit nyoppretta bruk eller eit bruk som ikkje har eit nedervd namn.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019), tidlegare § 8.\n\n## § 6. Igangsetjing av stadnamnsak\n\nSaker om skrivemåten av stadnamn kan takast opp av\n\n1. eit offentleg organ og andre som er nemnde i [§ 1](lov/1990-05-18-11/§1) tredje ledd\n2. eigaren eller festaren i saker som gjeld namn på eige gardsbruk eller eigedom\n3. ein lokal organisasjon med særleg tilknyting til eit stadnamn\n4. stadnamntenesta\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019), tidlegare § 5.\n\n## § 7. Avgjerder\n\nKommunen vel namn på og vedtek skrivemåten på tettstader, grender, kommunale gater, vegar, torg, bydelar, bustadfelt, kommunale anlegg o.l. og vedtek skrivemåten av offisielle adresser.\n\nFylkeskommunen vel namn på og vedtek skrivemåten av namn på fylkeskommunale anlegg o.l.\n\nStatlege organ vel namn på statlege anlegg. Eit reinbeitedistrikt vel namnet på distriktet. Statens kartverk vedtek skrivemåten av gardsnamn, bruksnamn, seternamn, naturnamn, namn på reinbeitedistrikt, namn på statlege anlegg o.l. dersom ikkje anna er fastsett i lov eller forskrift.\n\nDet kan gjerast samlevedtak for skriftforma av eit namneledd innanfor det same administrative området.\n\nEr det tvil om kven som etter desse reglane skal fastsetje skrivemåten av eit stadnamn, kan spørsmålet leggjast fram for departementet til avgjerd.\n\nEi namnesak må reisast samtidig for parallellnamn på norsk, samisk og kvensk.\n\nMed mindre anna er fastsett i lov eller i medhald av lov, gjeld reglane i [forvaltningsloven kapittel IV](lov/1967-02-10/kapiv), V og VIII ikkje for saker etter lova her.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)) som endra med [lov 17 juni 2005 nr. 90](lov/2005-06-17-90) (ikr. 1 jan 2008, etter [res. 26 jan 2007 nr. 88](forskrift/2007-01-26-88)) som endra med [lov 26 jan 2007 nr. 3](lov/2007-01-26-3), [21 juni 2019 nr. 59](lov/2019-06-21-59) (ikr. 1 juli 2019).\n\n## § 8. Kunngjering og høyring\n\nNår ei namnesak er teken opp med vedtaksorganet, skal saka gjerast kjend for dei som har rett til å uttale seg. Kommunane har ansvar for å kunngjere at det er reist namnesak.\n\nI saker om skrivemåten av nedervde bruksnamn, der eigaren har rett til å fastsetje skrivemåten, jf. [§ 5](lov/1990-05-18-11/§5) tredje ledd, kan skrivemåten vedtakast utan høyring.\n\nEigaren eller festaren har rett til å uttale seg i saker som gjeld skrivemåten av bruksnamn. Eigaren eller festaren har òg rett til å uttale seg i saker som gjeld gardsnamn, når skrivemåten av gardsnamnet skal vere retningsgivande for skrivemåten av bruksnamnet.\n\nKommunane har rett til å uttale seg når vedtaket skal gjerast av andre organ enn kommunen sjølv. Fylkeskommunane har rett til å uttale seg i saker som gjeld område som femner om meir enn ein kommune. Lokale organisasjonar har rett til å uttale seg i saker som gjeld stadnamn organisasjonen har ei særleg tilknyting til.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019).\n\n## § 9. Tilråding\n\nFør det blir gjort vedtak om skrivemåten, skal stadnamntenesta gi tilråding om skrivemåte, namneskikk og namnsetjing.\n\nGrunneigaren kan be om å få ei tilråding frå stadnamntenesta i saker som gjeld namn på eige gardsbruk eller eigedom.\n\n> Føyd til med [lov 21 juni 2019 nr. 59](lov/2019-06-21-59) (ikr. 1 juli 2019).\n\n## § 10. Gjenopning\n\nEi sak kan bli gjenopna av dei som er nemnde i [§ 6](lov/1990-05-18-11/§6) bokstav a til d, dersom det kjem til nye opplysningar. Nytt vedtak skal gjerast etter reglane i denne lova.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [19 juni 2015 nr. 74](lov/2015-06-19-74) (ikr. 1 juli 2015 iflg. [res. 19 juni 2015 nr. 726](forskrift/2015-06-19-726)), [21 juni 2019 nr. 59](lov/2019-06-21-59) (ikr. 1 juli 2019), tidlegare § 7.\n\n## § 11. Bruk av stadnamn\n\nNår skrivemåten av eit stadnamn er fastsett etter denne lova og ført inn i stadnamnregisteret, skal han brukast av eige tiltak av dei som er nemnde i [§ 1](lov/1990-05-18-11/§1) tredje ledd.\n\nSamiske og kvenske stadnamn som blir nytta blant folk som bur fast på eller har næringsmessig tilknyting til staden, skal til vanleg brukast av det offentlege t.d. på kart, skilt, i register saman med eventuelt norsk namn.\n\nOffentlege organ og andre som er nemnde i [§ 1](lov/1990-05-18-11/§1) tredje ledd, skal halde fram med å bruke dei skriftformene som er i bruk av det offentlege når lova blir sett i verk, til det eventuelt blir gjort endringsvedtak.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [21 juni 2019 nr. 59](lov/2019-06-21-59) (ikr. 1 juli 2019), tidlegare § 9.\n\n## § 12. Klage\n\nVedtak etter denne lova kan påklagast av dei som etter [§ 6](lov/1990-05-18-11/§6) første ledd bokstav a til c har rett til å ta opp saker om skrivemåten av stadnamn. Tilsvarande gjeld for vedtak om namnsetjing etter anna lov, dersom vedtaket er i strid med § 3 i lova her. Offentlege organ har berre klagerett i saker som gjeld namn dei skal bruke i tenesta. Klageretten gjeld også vedtak gjorde av kommunar og fylkeskommunar. Ei klage skal grunngivast. Vedtak gjorde av eit departement i medhald av delegert mynde, eller av Kongen, kan ikkje påklagast.\n\nKlager på andre vedtak enn dei som er gjorde av eit departement, skal behandlast av ei klagenemnd oppnemd av Kongen. I klagesaker av prinsipiell karakter kan klagenemnda gi Språkrådet, Sametinget og departementet høve til å uttale seg.\n\nFeilbruk og manglande bruk av stadnamn etter [§ 11](lov/1990-05-18-11/§11) kan påklagast til det organet som er nærast overordna det organet som klagen gjeld. Statsforvaltaren er klageinstans når klagen gjeld kommunale eller fylkeskommunale organ. Manglande vedtak kan påklagast til klagenemnda.\n\nEit departement som gjer vedtak om skrivemåte, har plikt til å ta saka opp til ny avgjerd etter klage. Departementet skal i slike saker innhente tilråding frå klagenemnda.\n\nFor førebuinga av ei klagesak gjeld saksbehandlingsreglane i [§§ 8](lov/1990-05-18-11/§8) og 9 tilsvarande. Elles gjeld reglane i [forvaltningsloven kapittel VI](lov/1967-02-10/kapvi).\n\n> Føyd til med [lov 21 juni 2019 nr. 59](lov/2019-06-21-59) (ikr. 1 juli 2019), endra med lov [7 mai 2021 nr. 34](lov/2021-05-07-34) (ikr. 1 juni 2021 iflg. [res. 7 mai 2021 nr. 1416](forskrift/2021-05-07-1416)).\n\n## § 13. Stadnamntenesta\n\nSpråkrådet er stadnamnteneste for norske og kvenske stadnamn. Sametinget er stadnamnteneste for samiske stadnamn.\n\nStadnamntenesta skal gi rettleiing og tilråding om skrivemåten av stadnamn, namneskikk og namnsetjing. Tenesta kan òg uttale seg om bruk av stadnamn.\n\n> Føyd til med [lov 21 juni 2019 nr. 59](lov/2019-06-21-59) (ikr. 1 juli 2019).\n\n## § 14. Stadnamnregister\n\nDet skal førast eit sentralt stadnamnregister.\n\nAlle skriftformer som er endeleg fastsette, skal meldast til stadnamnregisteret av det organet som har gjort vedtaket.\n\nOpplysningane i registeret er offentlege.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [21 juni 2019 nr. 59](lov/2019-06-21-59) (ikr. 1 juli 2019), tidlegare § 12.\n\n## § 15. Forskrift og unntak\n\nDepartementet kan gi forskrift til utfylling og gjennomføring av lova.\n\nNår særlege grunner talar for det, kan departementet i enkelttilfelle gjere unntak frå reglane i lova og forskrifta.\n\n> Endra med [lover 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), [21 juni 2019 nr. 59](lov/2019-06-21-59) (ikr. 1 juli 2019), tidlegare § 13.\n\n## § 16. Iverksetjing\n\nDenne lova gjeld frå den tid Kongen fastset.[^1]\n\nFrå same tid blir det gjort følgjande endring i [lov av 23. juni 1978 nr. 70](lov/1978-06-23-70) om kartlegging, deling og registrering av grunneiendom (delingsloven): – – –\n\n> Endra med [lov 10 juni 2005 nr. 53](lov/2005-06-10-53) (ikr. 1 aug 2006 iflg. [res. 10 juni 2005 nr. 533](forskrift/2005-06-10-533)), tidlegare § 13, endra med [lov 21 juni 2019 nr. 59](lov/2019-06-21-59) (ikr. 1 juli 2019), tidlegare § 14.\n\n1 Frå 1 juli 1991 iflg. [res. 18 mai 1990 nr. 361](forskrift/1990-05-18-361).\n",
 "title": "Lov om stadnamn (stadnamnlova)",
 "type": "lov"
}