{
 "canonical_id": "nl-20180420-007#paragraf-13",
 "canonical_url": "https://lovspor.no/lov/våpenlova/paragraf/13/",
 "heading_id": "13",
 "language": "nn",
 "links": {
  "parent": "https://lovspor.no/lov/våpenlova/"
 },
 "provenance": {
  "renderer_version": 8,
  "representation_hash": "c3e7ba6bbad7312f70c1293c00203994833a7bbb449d7d0937366a03e1e07c2d",
  "retrieved_at": "2026-07-30T18:17:57.344275+00:00",
  "source_revision": "a2fba06569b8c38bc6677ec5fa6470367167dad0",
  "xml_hash": "6c942c4ffa5b3accf024f4836eb35cfe3602f3889dcc943dd93d22aa9ed3751c"
 },
 "ref_id": "lov/2018-04-20-7",
 "schema_version": "1",
 "slug": "våpenlova",
 "source": {
  "dataset": "gjeldende-lover",
  "license": "NLOD 2.0",
  "license_url": "https://data.norge.no/nlod/no/2.0",
  "provider": "Lovdata",
  "statement": "Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form."
 },
 "temporal": {
  "date_in_force": "2021-06-01",
  "last_change_in_force": "2026-07-01",
  "note": "Current corpus state; not an applicability-at-date determination.",
  "status": "current"
 },
 "text": "### § 13. Erverv av skytevåpen, våpendelar og ammunisjon til samling\n\nPersonar som er medlemmer i godkjent våpensamlarorganisasjon, og som oppfyller krava til våpendugleik som er fastsette i medhald av femte ledd nr. 2, kan få løyve til å erverve og ha løyvepliktige skytevåpen, våpendelar og ammunisjon etter [§§ 5](lov/2018-04-20-7/§5), [6](lov/2018-04-20-7/§6) og [7](lov/2018-04-20-7/§7) til samling. Eit løyve som nemnt i første punktum skal vere sakleg avgrensa til eitt eller fleire våpenhistorisk grunngjevne samleområde.\n\nPolitiet kan berre gje løyve til å erverve og ha skytevåpen som er nemnde i [§ 5](lov/2018-04-20-7/§5) andre ledd, eller som er forbodne i medhald av [§ 5](lov/2018-04-20-7/§5) tredje ledd, og våpendelar som er forbodne i medhald av [§ 6](lov/2018-04-20-7/§6) tredje ledd, når skytevåpenet eller våpendelen enten er særskild sjeldan, eller når gjenstanden dokumenterer forhold av særskild historisk betyding.\n\nPolitiet kan i samsvar med forskrift fastsett i medhald av femte ledd nr. 4 gje løyve til å erverve og ha ammunisjon som nemnt i [§ 7](lov/2018-04-20-7/§7) tredje ledd eller i medhald av [§ 41](lov/2018-04-20-7/§41) nr. 6.\n\nDen som har erverva løyvepliktige gjenstandar som nemnde i [§§ 5](lov/2018-04-20-7/§5), [6](lov/2018-04-20-7/§6) eller [7](lov/2018-04-20-7/§7) etter reglane i denne paragrafen, kan ikkje bruke gjenstandane til andre føremål enn samling.\n\nKongen gjev forskrift om:\n\n1. vilkår for å rekne samleområde som våpenhistorisk grunngjeve,\n2. krav til våpendugleik for erverv til samling,\n3. talet på løyvepliktige skytevåpen eller våpendelar etter [§§ 5](lov/2018-04-20-7/§5) og [6](lov/2018-04-20-7/§6) som kan ervervast til samling,\n4. erverv av løyvepliktig ammunisjon til samling, medrekna ammunisjon som nemnt i [§ 7](lov/2018-04-20-7/§7) tredje ledd,\n5. test- og demonstrasjonsskyting med løyvepliktige skytevåpen som er erverva til samling.\n\n> Endra ved lov [7 mai 2021 nr. 33](lov/2021-05-07-33) (ikr. 1 juni 2021 iflg. [res. 7 mai 2021 nr. 1415](forskrift/2021-05-07-1415)).\n",
 "title": "Erverv av skytevåpen, våpendelar og ammunisjon til samling",
 "type": "paragraf"
}