(1) Grunnskulelærarutdanning og 5-årig lektorutdanning har krav om at søkjarar må dokumentere minimum 35 skulepoeng og eit gjennomsnitt på minimum karakteren 3,0 i norsk (393 timar) og 4,0 i fellesfaget matematikk (224 timar) eller minimum 40 skulepoeng og eit gjennomsnitt på minimum karakteren 3,0 i norsk (393 timar) og 3,0 i fellesfaget matematikk (224 timar). Karakterkravet i matematikk gjeld ikkje for søkjarar som kan dokumentere bestått programfag i matematikk med eit omfang på minst 140 timar eller tilsvarande. Søkjarar kan i tillegg måtte gjennomføre ei opptaksprøve i form av eit intervju etter nærmare reglar fastsette av institusjonen.
For søkjarar som har samisk som førstespråk eller andrespråk, gjeld karakterkravet i norsk for gjennomsnittet av karakterane i norsk (309 timar) og samisk (309 timar).
For søkjarar som har norsk teiknspråk, kvensk eller finsk som andrespråk, gjeld karakterkravet i norsk gjennomsnittet av karakterane i første- og andrespråket.
For søkjarar til grunnskulelærarutdanning ved Samisk høgskole gjeld i tillegg krava som er fastsette i § 4-10.
(2) Grunnskulelærarutdanning og 5-årig lektorutdanning med realfag, miljø- og naturfag har krav om at søkjarar må dokumentere minimum 35 skulepoeng og eit gjennomsnitt på minimum karakteren 3,0 i norsk (393 timar) og i tillegg kravet som er fastsett for realfag, miljø- og naturfag i § 4-3 tredje eller fjerde ledd.
(3) Grunnskulelærarutdanning med musikk har krav om at søkjarar må dokumentere minimum 35 skulepoeng og eit gjennomsnitt på minimum karakteren 3,0 i norsk (393 timar) og 4,0 i fellesfaget matematikk (224 timar) eller minimum 40 skulepoeng og eit gjennomsnitt på minimum karakteren 3,0 i norsk (393 timar) og 3,0 i fellesfaget matematikk (224 timar). Karakterkravet i matematikk gjeld ikkje for søkjarar som kan dokumentere bestått programfag i matematikk med eit omfang på minst 140 timar eller tilsvarande. I tillegg kan institusjonen fastsetje krav om dokumenterte kunnskapar og ferdigheiter i musikk etter nærmare reglar.
(4) Grunnskulelærar- og barnehagelærarutdanning med sørsamisk eller lulesamisk har krav om at søkjarar må dokumentere kunnskapar i sørsamisk eller lulesamisk språk etter nærmare reglar fastsette av institusjonen. For grunnskulelærarutdanning gjeld i tillegg at søkjarar må dokumentere minimum 35 skulepoeng og eit gjennomsnitt på minimum karakteren 3,0 i norsk (393 timar) og 4,0 i fellesfaget matematikk (224 timar) eller minimum 40 skulepoeng og eit gjennomsnitt på minimum karakteren 3,0 i norsk (393 timar) og 3,0 i fellesfaget matematikk (224 timar). Karakterkravet i matematikk gjeld ikkje for søkjarar som kan dokumentere bestått programfag i matematikk med eit omfang på minst 140 timar eller tilsvarande.
(5) Faglærarutdanning i praktiske og estetiske fag og Lærarutdanning i praktiske og estetiske fag for trinn 1–13 (5-årig) har krav om at søkjarar må dokumentere minimum 35 skulepoeng og eit gjennomsnitt på minimum karakteren 3,0 i norsk (393 timar) og 3,0 i matematikk (224 timar). Søkjarar til faglærarutdanning i musikk, dans og drama må i tillegg dokumentere kunnskapar og ferdigheiter i musikk, dans eller drama etter nærmare reglar fastsette av institusjonen.
(6) Grunnutdanning i musikk, dans og drama som er pedagogisk retta kan ha krav om at søkjarar må dokumentere kunnskapar og ferdigheiter i musikk, dans eller drama etter vedtak og nærmare reglar fastsette av institusjonen.
(7) Yrkesfaglærarutdanning har krav om fag-/sveinebrev eller anna fullført og bestått 3-årig yrkesutdanning i skule frå vidaregåande opplæring og 2 års relevant praksis etter avslutta utdanning. I dei tilfella der ein må ha autorisasjon for å praktisere i yrket, må ein òg ha autorisasjon for å komme inn på yrkesfaglærarutdanninga.
(8) 3-årig lærarutdanning for tospråklege lærarar har krav om at søkjarar må dokumentere eit gjennomsnitt på minimum karakteren 3,0 i norsk (393 timar) og tospråkleg kompetanse etter nærmare reglar fastsette av institusjonen.
Endra ved forskrifter 23 nov 2018 nr. 1767 (i kraft 1 jan 2019), 26 nov 2019 nr. 1580 (i kraft 1 jan 2020), 16 des 2020 nr. 2916 (i kraft 1 jan 2021), 22 jan 2021 nr. 211 (i kraft 31 jan 2021), 9 april 2021 nr. 1130, 1 des 2021 nr. 3391 (i kraft 1 jan 2022), 11 jan 2022 nr. 52 (i kraft 12 jan 2022), 2 feb 2023 nr. 134, 19 des 2024 nr. 3488.
Inneholder data under Norsk lisens for offentlige data (NLOD 2.0), tilgjengeliggjort av Lovdata. Informasjonen er transformert og strukturert av Lovspor og gjengis ikke i sin opprinnelige form. Lovspor er ikke offisiell kunngjøringskilde. Lisenstekst.